Air Jordan Remastered系列 列隊登場

其實有理由相信每一位會買Air Jordan波鞋的都是病態Sneakerhead，明知近年復刻版本做工、用料比不上原版，但大家都繼續願意爭相排隊街或以炒價入手，務求得到籃球之神眷顧，相信單單2014年大家都已經排到夠、炒到夠。做人當然要放眼明天（年），可能Jordan Brand都有見近年復刻的Air Jordan鞋款QC水準參差，所以於2015年春季便推出首回名為Air Jordan Remastered系列，暫時已公布系列包括三對Air Jordan IV、一對Air Jordan VII及三對Air Jordan X，鞋身所用的皮革（大多為荔枝皮）明顯更為高級，做工質感更勝從前，當然售價亦同步提升，但如果膠水漬可以少、Jumpman Logo整齊，相信一眾AJ迷都唔介意畀多少少。到底呢個Remastered系列係龍係鳳好快就知，因為第一對Air Jordan IV Columbia將會於2015年1月10日於美國發售，定價為US$180（約HK$1,404），但香港發售日期及定價則有待確定，大家即管放長雙眼睇下「波神」點樣繼續叫你哋心甘命抵「添香油」！