Docomo F-02G聖誕靚芒王

日系手機嘅推出時間向來有季度之分，臨近聖誕，冬、春季旗艦作終於有聲氣！當中來自Fujitsu嘅F-02G就大玩破格八角設計，最強撒手鐧就係其5.2吋屏幕，唔單止解像度高達2,560×1,440，像素密度更係暫時全球最高，有564ppi，畫面細緻度砌低LG G3、iPhone 6 Plus等機王！

附送底座，方便充電同睇片。

拍埋iPhone 6 Plus，兩機都同時校到最高亮度，F-02G（左）畫面色水較自然，iPhone 6 Plus（右）色水相近，可惜明顯過曝。

Slide Display將畫面即時縮細向下移，單手使用都冇問題。

八角形機身，唔講仲以為佢係三防機。

鏡頭下設有指紋辨識器，掃動手指即可將屏幕解鎖，不過靈敏度一般。

機身最薄位置都有成9.4mm，相對累贅。

拍攝介面簡單，提供連拍、HDR等實用功能。

My Magazine內置不同類型嘅日本新聞，哈日迷一定日日煲。

原生播放器支援Audyssey Dynamic EQ，可以調校不同音效效果。

Multi-Connection屬廠商獨家功能，可以同時連接Wi-Fi及4G，加速下載。

Benchmark分數雖然唔算好高，不過實際使用又超流暢。

近期手機紛紛換上2K屏幕，作為旗艦大作，F-02G當然唔例外，備有2,560×1,440解像度5.2吋芒，犀利在屏幕像素密度竟然高達564ppi，比同樣玩靚芒、屏幕像素密度為534ppi嘅LG G3以及iPhone 6 Plus嘅Retina HD（401ppi）屏幕仲要高；原來呢項數據，暫時仲係5吋或以上智能手機入面全球最高添！數據贏晒，肉眼睇都對辦，超近距離下都睇唔到任何像素點，而且採用嘅Super Clear Panel屏幕顏色自然，可視角、亮度都相當高，顯示效果實屬超班。另外，此機亦備有支援杜比音效嘅前置喇叭，低音、音量輸出俱佳，鍾意睇片至啱使！

八角機身夠特別

屏幕高質，就連機身都一樣有型！F-02G機身採用少見嘅八角形設計，機背仲用上防滑物料，驟眼睇都幾似三防手機，查實此機只係支援日系機常見嘅IPX5/IPX8標準，可以於1.5米水深正常使用30分鐘，另外就因應寒冷冬天而特別兼容「風呂防水」，可以應付勁濕及高溫嘅環境，帶埋浸溫泉都冇有怕。留意機身厚達9.4mm及重166g，比起近期推出嘅輕薄新機明顯累贅，便攜性只屬一般。

支援高速下載

至於硬件就內置Qualcomm Snapdragon 801 2.3GHz四核心處理器、3GB RAM以及2,070萬像素鏡頭等，與大廠旗艦機相若，配合Android 4.4作業系統及Docomo LIVE UX介面，操作相當流暢。另外，F-02G機背鏡頭下設有指紋辨識器，掃動手指即可將屏幕解鎖，都算實用。不能不提佢內置多項新功能，包括Slide Display以及Multi-Connection，前者於虛擬功能欄加設一個下箭嘴按鍵，一按顯示畫面就會縮細向下移動，方便單手操作；後者則可以同時連接Wi-Fi及LTE網絡，令下載速度大幅提升。