Microsoft擔正Lumia 535廣角自拍

Microsoft早前講明旗下智能手機將唔會再用Nokia之名發售，而第一部換上新牌頭嘅手機名為Lumia 535，機身、機背以至操作系統入面顯示嘅「Nokia」字樣全換晒做「Microsoft」。此機主攻平價機市場，千三蚊有找，但就有齊5吋大芒，以及500萬像素前置廣角鏡頭，自拍最正！

Lumia 535 $1,298

採用5吋屏幕，機頂招牌換咗做Microsoft。

兼容雙卡雙待功能，兩張SIM卡都係用最普及嘅microSIM。

8.8mm機身唔算好薄，其弧邊設計手持時都幾舒服。

後置鏡頭只有500萬像素，質素只屬一般。

1,905mAh電池竟然用到差唔多一整日，耗電量相當低。

Lumia Camera內置濾鏡、包圍曝光等功能，可惜未有提供舊有嘅快門、ISO等設定。

提供多個後製相片功能，可隨時加入濾鏡或調校相片。

《HERE地圖》提供香港街道路線外，更可以下載世界各地離線地圖。

一系列專屬Apps都用咗Lumia之名，Nokia字樣從此告別。

延續往日風格

以往Nokia出品嘅Lumia系列手機幾乎同Windows Phone畫上等號，而呢部Lumia 535就正式「易幟」，昔日機面、機背、電池等當眼位置都必定搵到嘅Nokia招牌已徹底消失，換成「Microsoft」；就連見慣見熟嘅握手開機畫面都冇埋！雖然品牌轉咗，不過風格依舊，圓角黑色機面，搭包圍四邊嘅拋光塑膠底殼，再加上有綠、橙、黑、白四色揀，搶眼又年輕，應該可吸引一班預算有限嘅後生仔入手。

入門規格唔見窒

好多品牌為響頭炮，多數會推出旗艦級手機，Microsoft就偏偏相反，Lumia 535主打入門市場，用1.2GHz Qualcomm Snapdragon 200處理器同1GB RAM，硬件同入門Android機相似，不過因為採用出名流暢嘅Windows Phone 8.1 Denim作業系統，所以整體操作都非常之順，撥頁、開Apps都亦唔見窒，唯一係玩多工作業明顯要Load多幾秒，不過絕對屬可接受程度。另Lumia 535內置8GB ROM，支援128GB microSD記憶卡，加上免費送你15GB OneDrive雲端儲存空間，加埋有超過150GB容量，都好夠使。此機支援雙卡雙待功能，適合經常外遊的朋友。

專有程式執靚樣

此機備有5吋屏幕，用上IPS素材及自家屏幕技術，陽光底下可清晰睇芒；再配合Corning Gorilla Glass 3玻璃，減少屏幕刮花嘅機會。至於軟件名稱就以Lumia掛帥，例如「Lumia Camera」、「Lumia Creative Studio」等等，當中前者內置包圍曝光、智慧連拍等拍攝功能，後者屬後製相片軟件，有大量濾鏡同效果，相當好玩。值得一讚係Lumia 535力推自拍功能，前置鏡頭高達500萬像素，兼支援24mm廣角，群拍都得；另外內置「Lumia Selfie」，可以為自拍相加入大眼、亮眼、美白、瘦面等效果，加埋多達廿款濾鏡，肯定自拍影到冇停手。