一首洗腦兒歌《Let It Go》於街頭巷尾日播夜播，就令全港小朋友個個中晒「冰毒」，幼稚園開Halloween Party個個唔係扮Elsa就係Anna，YouTube點擊率更超過2億次，「冰雪旋風」入屋同時入埋腦！

官方照片隱約睇到單品設計都幾「迪士尼」。

銀座店內已換上《FROZEN》裝潢布置。

今回，由川久保玲（Rei Kawakubo）主理的時尚潮店Dover Street Market Ginza就決定「玩大佢」，同呢套迪士尼超人氣卡通片《FROZEN》攜手合作，率先於銀座店推出一系列聯名單品，設計係咪「好迪士尼」暫時唔知，因為款式設計及定價尚未有進一步資料，但單睇店內換上的裝潢布置已感受到股「寒氣」，見到實物同價位可能心都寒埋！今次「玲姐」擺明要測試各位粉絲嘅忠誠度，大家以示忠心不二就好飛去銀座「添香油」！而稍後，此系列亦會分別於倫敦總壇及紐約店上架，北京店I.T BEIJING MARKET則暫不在列，要入手就請留意。