哈囉喂對話，如有雷同，實屬巧合。

龍婆：「慈禧太后前面條殭屍，麻煩你行快啲。」貞子：「叫你行快啲。」

吸血殭屍：「佢唔係叫我，叫佢呀。」

湘西殭屍：「叫我咩？我前面係清兵，唔係慈禧太后喎，係咪叫佢呀！」

喪屍：「一睇就知我係喪屍，我前面嗰個係如妃喎！」科學怪人：「嘩，你哋望吓嗰邊，一大群迷你Elsa女王。」

慈禧太后：「好似《Matrix》個西裝友一個變一百個，個個妹妹仔變咗Elsa，好恐怖。」科學怪人：「我哋快啲走，佢哋一陣又唱《Let It Go》，仲恐怖呀！」

慈禧太后：「清兵走去叫佢哋唔好喺街唱歌呀，你心口掛個勇字，你去呀。」清兵：「心口有個勇字都唔係咁玩呀，一人整塊冰掟我都凍死我呀。」

男：「睇人玩咁得意，出年我哋又嚟玩啦。」女：「好呀，我扮怪誕城之夢鬼新娘，你扮幽靈狗。哈哈。」

男：「你扮怨咒罷啦，日怨夜怨。」

女：「你扮滿清最後一個太監，我最多扮珍妃陪你。」

男：「你唔使點扮都似珍妃係井入面浸到發脹個樣。」女：「你都唔使扮都似太監。」男：「你落妝就可以慶祝萬聖節。」女：「你除褲就可以慶祝兒童節。」