Cool魔上身Bebop Drone航拍起機

外國非常流行的「航空拍攝」，近年香港也愈來愈多人迷上，不過揸住部iPad或iPhone玩，感覺始終不夠專業。新出的Parrot Bebop Drone就不同，玩家可透過專用眼鏡及遙控器，恍如揸真飛機般以第一身任意翱翔，而且仲可以拍埋高清片同廣角畫面，咁簡單就做到Cool魔，才投資$3,999而已！

Parrot Bebop Drone
$3,999（淨機）
$6,999（連Skycontroller）

Parrot無公布飛行高度，但由於機身內置壓力感應器，飛得太高會自動停下，但飛到天花板就一定無問題！

1,400萬像素前置鏡頭支援廣角及高清拍攝。

機底有影像穩定器及垂直鏡頭，可提升畫面穩定性。

電池可以更換，不過1,200mAh就略嫌太少！

開關及microUSB接口設於機背，不過玩得耐機身有微熱。

影像會預先儲存在機內8GB記憶體，之後可轉移至平板電腦上觀看。

影像實時傳送，完全無Delay！

共有藍、紅、黃三隻顏色以供選擇。

FPV眼鏡給玩家第一身視點，而且仲可瀏覽速度、高度、距離等資訊

加裝大包圍後，成部機型仔又防撞。

縮水機身飛得夠遠

航拍玩具大熱，搞到山寨貨成行成市，價錢無錯係平通街，但跌一跌就散，結果敗興而返。作為行業先驅，Parrot當然不會故步自封，繼大受歡迎的AR.Drone及AR.Drone 2.0後，日前再推第三代四軸飛行器Bebop Drone，身材來個大縮水，體積只有28×32×3.6cm、重390g，一個環保袋就可袋住周圍去。結構上仍然由機艙及四個螺旋槳組成，但由於的骰兼馬力大，因此在雙頻Wi-Fi天線幫助下，最遠接收範圍可遠達250米！

穩定靈活即時畫面

小記都玩過前兩代AR.Drone，今代未知是否減震器強化了，整部機飛得既穩陣又靈活，靠近冷氣風口時亦沒有打轉，航拍影像自然更加穩定。說到拍攝，此代的前置鏡頭提升至1,400萬像素，並支援1,080p全高清錄影及180度廣角拍攝，影風景比以前壯觀好多；而最重要係畫面Delay少，飛得近時亦做到同步處理，內置的雙核心處理器及GPU應記一功！然而有辣有唔辣，Bebop Drone依然飛唔耐，1,200mAH電池只夠玩11分鐘左右，建議帶多兩舊電傍身穩陣！

專業遙控第一視點

與以往一樣，Bebop Drone可加裝不同配件，最例牌是加個發泡膠大包圍來卸去撞擊力，跌落地都無咁傷！然而，最叫小記印象深刻的是Skycontroller，雖然要加多$3,000才買到，但絕對物有所值，事關它把iPad變成專業遙控器，左邊遙桿控制上下左右，右邊遙桿則控制飛行角度；而且一經使用，飛行距離擴展至2公里，實在有姿勢兼有實際！嫌遙控器未夠癲，玩家仲可另購FPV（First Person View）眼鏡，顧名思義給予玩家第一身視覺，鏡頭角度更會隨頭部動作而改變。小記試玩似足揸飛機，只不過操控難度不低，要操一輪先不致炒機收場。