既生瑜，何生亮？對唔少70後及80後嘅日系科幻迷嚟講，都會戥《機甲戰記威龍》（Metal Armor Dragonar）唔抵，無論故事以至機設都唔輸蝕，可惜機設風格同高達太似了，珠玉在前，令「威龍」僅僅推出咗一部電視連續劇之後就黯然而去，唔似高達咁長拍長有。不過，懷念「威龍」嘅朋友始終大有人在，Bandai今年亦終於將「威龍」帶入Robot魂完成品系列，並以人氣最高嘅男主角機體威龍1號改（Dragonar-1 Custom）打頭陣，龍迷準備掃貨未？

Robot魂《機甲戰記威龍》
XD-01SR Dragonar-1 Custom（R-No.169）建議零售價：$509.9

激光劍可以變成雙刃劍款式，大殺四方！

威龍系列嘅最大特色，就係背後裝有一對飛翼，Robot魂Dragonar-1 Custom又點會例外。

武器種類唔算多，只有機槍、激光劍、盾牌及軍刀，好彩造型美足以彌補一切。

面相造型充滿大張正己風格，不過可動性未算理想。

威龍嘅機設比高達寫實，翼下嘅火箭筴艙，同現實嘅戰機配套似到足。

雖然LPS32機槍上嘅彈匣可以拉出，不過手臂上嘅後備彈匣冇得掹出嚟，玩唔到換彈匣呢招。

小腿背後嘅軍刀掹得出嚟，抵讚！

大張正己唔只擅長機械人設定，畫人都同樣撚手，名作包括《餓狼傳說》動畫版。

《機甲戰記威龍》唔只有未來大戰，仲有唔少兒女情長嘅劇情，當中包括男、女主角若林健與Linda Plato嘅感情線。

話說《機動戰士ZZ高達》推出之後，Sunrise希望炮製一套全新嘅科幻動畫，機設方面同高達類似，不過風格上以至故事背景都要更加寫實化，「威龍」便於1987年應運而生，擔任機械設定一職者，正正係高達嘅始創者之一大河原邦男，難怪威龍1號同元祖高達咁相似，同樣以白、藍、紅三色為主，頭上亦都有一對V形天線，不過威龍1號更加貼近現實，武器以機關槍、激光劍以至手榴彈為主，唔似高達世界有浮游炮；駕駛艙又似足戰鬥機嘅Cockpit之餘，而且由航母甲板上彈射出動，似足未來版《Top Gun》，故此全套「威龍」動畫雖然只有48話就完結，不過依然令人難忘，即使再冇續集式嘅動畫作品面世，但已經成為「機戰」電玩系列嘅常客，Keep住高人氣。

玲瓏線條夠浮誇

今次Robot魂推出嘅Dragonar-1 Custom，屬於故事中後期男主角若林健嘅專用機體。熟悉「威龍」嘅朋友，一定唔會對大張正己陌生，呢位充滿個人風格嘅動畫大師，初出道時就負責「威龍」前期嘅OP製作，將一眾威龍機體畫到充滿肌肉感，線條極具力量感，與大河老師嘅平實風格截然不同，坦白講，唔少「龍友」都鍾意「大張風」多過「大河風」。Robot魂Dragonar-1 Custom嘅造型就頗有大張風格，修長嘅四肢、偏幼嘅腰位，裝甲線條又玲瓏浮凸，一字記之曰︰英！而且耍帥之餘亦有高可動性，尤其是肩甲雖然大大件，不過可以前後移位，又可以向上揭起，唔會阻住雙臂擺動；美中不足係頭部為咗展現大張風格，所以兩邊面甲又長又尖，擰頭時會同頸甲頂住，所以頭部嘅左右轉動幅度唔算多。

武器設計未盡完善

至於武器附件方面，呢款Robot魂有讚亦有彈，雙翼似足艦載機可以放平，翼下嘅飛彈筴艙亦算造工細緻，不過白色嘅機翼有線位就冇滲線，嘥料！另一方面，小腿背後有刀匣，裏面嘅軍刀掹到出嚟，奇就奇在手臂上嘅彈匣、右腰嘅飛碟形投擲爆彈，以至右邊膊頭嘅手榴彈都得個樣，掹唔出，講唔通喎！講到有氣勢嘅武器，都係一對激光劍，事關劍刃可以組裝喺長身劍柄上，變成雙刃劍模樣，分外有氣勢。

查詢：2433 1828（瑞華行）