Comic × Sneakers漫畫球迷起哄
對於自小飲慣日版波鞋奶水大的波鞋迷嚟講，由日本團隊所設計的波鞋係零舍唔同，要知New Balance MT580及M1400等等經典波鞋都係日本潮界一手捧紅，基本上顏色獨特加上日版限定都已經必定大賣，一個唔該再加埋同日本漫畫聯名的話，所產生嘅威力就真係1+1=3咁厲害！
三井壽及魚住純同樣着上ASICS鞋款，清田信長、流川楓及仙道彰則分別着用Reebok D-Time、Air Jordan 5及CONS Pro Conquest Mid。 （互聯網圖片）
《男兒當入樽》× Air Jordan 6 （互聯網圖片）
《男兒當入樽》x Air Jordan Super Fly 3（互聯網圖片）
櫻木花道穿上Air Jordan 1（互聯網圖片）
聯乘版鞋側23號換上櫻木花道的10號（互聯網圖片）
櫻木花道同學小田龍政所着用的Air Jordan 8（互聯網圖片）
用上與「勝利者」一樣配色的《四驅兄弟》× New Balance 574（互聯網圖片）
《逆轉監督》× Mihara Yasuhiro聯名鞋款（互聯網圖片）
為聯名系列設計出模仿球會徽章標誌，夠認真！（互聯網圖片）
《小飛俠》× LACOSTE（互聯網圖片）
《海賊王》× UBIQ（互聯網圖片）
《男兒當入樽》 × Air Jordan
由日本知名漫畫家井上雄彥所畫的籃球漫畫《男兒當入樽》，筆下漫畫人物就經常着用Air Jordan波鞋，近日兩個單位終於展開真正合作，以主角櫻木花道作靈感，打造出Air Jordan 6及Super Fly 3兩款聯名波鞋，由漫畫正式殺入真正嘅籃球場。其實在《男兒當入樽》漫畫當中，除了由櫻木花道及流川楓着紅咗人所皆知的Air Jordan 1、Air Jordan 5及Air Jordan 6外，仲有較少人提及小田龍政着用的Air Jordan 8。其實內裏登場人物所着用的波鞋款式亦一樣為人所津津樂道，如三井壽的ASICS TBF707、赤木剛憲的CONS Pro Conquest Hi及牧紳一的Reebok D-Time等等，各大品牌真係可以諗諗佢！
《四驅小子》 × New Balance 574
除了球場上的《男兒當入樽》外，賽車場上的《四驅小子》亦是另一套對80後滿載童年回憶嘅漫畫。數年前，日本知名汽車模型品牌Tamiya（雙星牌）亦即四驅車的生產商，就曾與New Balance聯名合作，以四驅車「勝利者」所採用的配色推出一對574鞋款，近期「四驅車」全面回歸，雙星牌大可再次與New Balance合作，將每款四驅車的配色運用到鞋款之上，相信反應必定會好熱烈。
《逆轉監督》 × Mihara Yasuhiro
當你以為只有SOPH. 設計師清永浩文喜愛踢足球時，擅長「玩鞋」的三原康裕（Mihara Yasuhiro）就用行動證明，佢都一樣好鍾意足球，仲直頭同足球漫畫《逆轉監督》聯名合作，打造出一系列融入足球主題的單品，當中鞋款就用上質感馬毛打造，鞋舌位置更加入球會徽章點綴，將漫畫足球主題導入到擅長的鞋款設計之上。
另類組合
除上述三個廣為人知的聯名系列外，日本漫畫其實亦不時會「誤闖」波鞋界，好像手塚治虫經典的《小飛俠》及人氣動漫《海賊王》就分別與LACOSTE及UBIQ推出聯名波鞋，將漫畫圖案印於鞋款之上，靚唔靚就真係見仁見智，但經典同罕有兩個理由，已足夠令波鞋迷爭崩頭去買！
