上回提要：有天乘港鐵，我遇上了討厭的「柱男柱女」，其「肉」背狠狠地如煎釀三寶的魚肉般釀了上扶手柱，除非你只有兩歲，矮得只需扶她下盆以下的柱腳，或是你高到頂天花可以扶她頭上那一截空位。那位「柱女」大嬸公然「佔柱」，其他人想扶都沒得扶，真正「冇佢乎」。我也不是省油的燈，面於如此狀況就按捺不住要發聲了。

年少輕狂時我會沉不住氣主動進攻，努力「攝」手入那片魚肉與扶手柱中間，然後凸出手指公，務求令柱男柱女覺得背部不適而放棄靠背（此舉有一危機，如果手指公正正拮中柱男柱女的穴位，他們大叫一聲「爽呀」然後繼續靠背希望得到穴位按摩服務，所以手指公留指甲也是王道）。

現在人大了，沉着應戰，不出指公，只出口術。我在柱女大嬸旁邊以不徐不疾的語氣說：「我咁矮，明明我應該扶低啲，但係依家夾硬要舉高隻手扶到咁高，點解條柱係要嚟挨唔係要嚟扶呢？」大嬸分明聽到我的投訴，但仍繼續靠柱，我雖不是她肚裏那條蟲，但我知道她心底裏已冒火，暗罵我「厚多士」。因為接下來聽到她與丈夫的對話，類似是問「陣間飲茶乜乜乜」之類的，丈夫普通回應一句，大嬸卻忽然暴跳如雷：「你唔想飲咪唔好飲囉！」明顯躁底，相信被篤爆是柱女之後陣腳亂了。跟丈夫口角幾句後憤然離開了扶手柱，～成功擊退柱女！

（完）