Alcatel One Touch Hero 8 4G片王

4G制式喺香港經已普及，4G手機就有一大堆，不過4G平板選擇卻相當有限。如果想搵部4G平板的話，Alcatel One Touch Hero 8應該啱使，此新機特別在於支援多頻LTE網絡，香港咩網絡都合用，甚至出國都用得；加上配備8吋大芒，隨時串流睇片煲劇夠晒爽。

Alcatel One Touch Hero 8 4G $2,999

機身備有8吋IPS屏幕，顯示質素唔錯。

機背採用鋁金屬物料，手感不俗。

卡槽採用一體設計，需要使用卡針方能打開，稍為不便。

採用自家介面，虛擬功能鍵仲改埋做類似Android L風格。

支援多工小視窗，可以同時開啟多個指定程式。

採用MediaTek八核處理器，跑分都有接近20,000分。

支援通話功能，隨時打電話都冇問題。

對應六頻4G

市面上支援4G嘅Gadgets，好多都僅僅兼容1,800及2,600MHz兩條頻譜，香港就話啱用，不過去到外地，就算有SIM卡都得物無所用。有見及此，Hero 8就支援六頻LTE，除1,800、2,600MHz外，仲兼容埋800、850、900同埋2,100MHz，去到歐美、日韓都用到，超方便。小記實測，發現訊號接收穩定，戶外一般都有超過20Mbps，串流唔使慢慢等。

配備八核加靚芒

既然有得用4G網絡，梗係要多啲上網睇片。Hero 8備有8吋屏幕，解像度達1,920×1,200，相當細緻，仲用上IPS素材，顏色準確，而且可視角高，顯示效果一流。另外，其機身特別採用鋁金屬物料，厚度亦只有7.5mm，機身手感不俗。規格方面，Hero 8搭載1.7GHz八核心處理器，配合2GB RAM，操作流暢。最正係內置4,060mAh特大電池，續航力有保證，玩耐啲都冇問題。

支援手提通話

至於軟件就預載Android 4.4作業系統，圖示、介面都用上平面化設計，感覺都幾清新。較特別嘅功能就要數多重視窗，可以同時以小視窗開啟多個指定應用程式，啱晒鍾意玩Multi-tasking嘅用家。值得一提，Hero 8其實都有埋電話功能，可以直接打出打入；可惜機身不設聽筒，用家要隨身帶備免提耳機。