《Forza Horizon 2》駕超跑南歐兜風
《Forza》系列賽車遊戲推出之頻密程度,大概比得上《Need for Speed》系列。即使係咁,以開放式鬥車玩法的新一集《Forza Horizon 2》都算有驚喜畀到玩家,除了收錄車款的精細度跟光源效果處理屬高水平外,還加入動態氣候變化系統,鬥車期間會突然下傾盆大雨,雨點同水漬都非常真實地在遊戲中呈現,絕對可稱得上係目前同類遊戲中最強。
《Forza Horizon 2》
收錄200架名車,包括林寶堅尼Huracán LP610-4。
今集遊戲地圖設定在南法及意利北部的地中海沿岸,風光明媚。
光源處理好有水準,從車身的反光位可見一斑。
遊戲收錄車款甚多,甚至乎連「餓之Van」都有得玩!
車身內籠設計都一樣做得好仔細。
每場比賽後都會因應表現而獲得不同程度的獎勵;而車身上的刮痕、凹痕亦清晰可見。
對住一塊咁靚的花田,當然要開攝影模式影張相留念。
《Alien:Isolation》
遊戲主角Amanda(左),是電影主角Ellen(右)的女兒。
千祈、千祈、千祈唔好同異形有近距離接觸!
主角可用手上的動態探測器搜尋異形的行蹤。
《Alien:Isolation》
新增動態氣候變化系統
《Forza Horizon 2》跟另一條產品線《Forza Motorsport》玩法略有不同,人家強調真實感,本作則玩輕鬆自由風格,以嘉年華形式包裝,玩家可以在地圖上自由參與各種賽事,又或者在各地開車吹吹風。今集遊戲場景設定在南法普羅旺斯蔚藍海岸同意大利托斯卡尼地中海沿岸一帶,風景美不勝收,加上今集引進動態氣候引擎,天光、天黑以至下雨時景色變化極靚,一定要用遊戲內的影相功能拍照兼Share畀朋友睇,否則真係嘥料。
200架經典名車任馳騁
本作比賽難度唔算好高,亦唔使太擔心如《Forza Motorsport》系列般要就住就住驚撞車。雖然本作撞車狀況同「戰績」會直接反映到車輛之上,不過即使撞到車身凹晒、「泵把」甩埋,都可以名列前茅返到終點。唔少場景都在郊區山坡上進行,亦設有好多捷徑可以畀玩家一試身手,平時駕駛安分守己的玩家都可考慮間中「出吓軌」。
如果在遊戲內使出如甩尾等花式,係會得到更多經驗值,對升級賽車同賺買道具配件好有幫助。遊戲內收錄了超過200部賽車,點題作係封面黃色超跑林寶堅尼Huracán LP610-4,除此之外,連經典跑車、越野車以至貨Van仔都有得玩,當然每架車的外觀和內籠,以至物理表現都做得好仔細。此外遊戲仲支援網上團隊比賽,可以同朋友組成車會作賽,值得一提係車會最多可以容納1,000名成員,認真誇張!
INFO
類型:賽車
開發:Playground Games、Sumo Digital
平台:Xbox One、Xbox 360
推出日期:已推出
售價:$419(Xbox One)、$329(Xbox 360)
查詢:3071 4868
同場加映:《Alien:Isolation》異形再現
好多賣驚慄恐怖氣氛的遊戲都排隊在10月推出,新一集異形遊戲《Alien:Isolation》亦唔例外。遊戲背景設定在2137年,即第一集電影《Alien》發生後15年,電影角色Ellen Ripley(薛歌妮韋花飾演)的女兒Amanda成為遊戲主角,要在太空站內解開母親失蹤之謎,主要敵人當然是神出鬼沒的異形。遊戲玩法傾向電影原著,以求生為主,主角在遊戲中有少量武器可用,但對付異形係無實際效用,反而要冷靜地諗吓目前身處的情況,如何利用簡單的工具、如動態探測器避開異形,避免正面衝突。於是,有些場景主角要匿喺枱底、儲物櫃,甚至要忍住呼吸避開異形,如果半夜一個人鎖埋自己喺房間熄燈玩,都唔好話唔驚!
INFO
類型:冒險
開發:The Creative Assembly
平台:PS4、Xbox One、PS3、Xbox 360
推出日期:已推出
售價:$338
查詢:2359 7998