日本有股機械人情意結，鐵人28、多啦A夢、機動戰士等著名動漫都同機械人有關。依家要擁有機械人唔使睇動漫，買本雜誌就得！只要大家買齊70期《Robi》周刊，就可以砌出一隻在日本備受歡迎嘅Robi機械人，佢識得握手、跳舞之餘，仲識聽識講廣東話，親切到暈！

Robi

創刊號《Robi》周刊有十多頁內容，講解Robi功能、玩法及機械人相關專題，另有八件Robi零件。
$49（創刊號）、$159起（2至70期）
推出日期：10月14日

雙眼設有LED，會因應不同模式着起紅、黃、藍燈。

關節加入Servo Motor，動作靈活。

腳底係絨布，亦可更換專用抹布，等Robi可以掃地。

機身設有喇叭，內藏微電腦底板控制指令。

頭頂有咪高峰，於寧靜環境並以低沉聲線發出指令時尤其準確。

Robi創作人高橋智隆到香港撐場，仲即席示範Robi玩法。

現場示範裝嵌Robi，用十字螺絲批就搞掂，螺絲批會隨第2期附送。

Robi平衡力極強，可以行走之外，仲可以單腳企，又識得跳舞，超可愛。

Robi早於上年2月已於日本開賣，今次嚟到香港玩法照舊，隨《Robi》周刊附送Robi零件，第1至第8期係送頭部組件，56至70期就係電路板、人體感測器等，儲晒70期就會有齊所有Robi零件。本身Robi裝嵌簡單，只要一把十字螺絲批就得，大人、細路都砌得掂；亦唔使設定任何電腦程式，砌完即玩！

靈活互動

講番Robi，佢手腳同頭部都有大量關節位，移動靈活之餘，亦可以郁手郁腳兼單腳企。最特別係Robi頭部內置語音辨識電路板及人體感測器，識得聽語音指令，亦會因應玩家位置擰轉頭對住你。港版最特別係支援廣東話，可理解約250個詞彙。好似同佢講「握手吖」，Robi就會伸手並且話「請多多指教」；同佢講「跳舞」，Robi就會播起音樂並郁手郁腳跳舞，跳完仲會抵死地話「唉！好攰呀！」。另外，配合設定後，Robi更可以計時、遙控開電視及掃地，互動得好過癮！順帶一提，《Robi》周刊除創刊號特價賣$49，其後每期售$159起，其中43、62、63、67期仲因為零件成本關係而要賣$229至$299，想砌完一隻Robi，要約年半時間儲齊零件，計落要畀$11,400港元，唔平o架！

查詢：3111 5302