新勢力領航港產合金鐵人
未來係屬於年輕人，故此我哋要相信年輕人，即使係大至社會運動，甚至捍衞地球和平，佢哋都絕對有能力走在最前；再鋒利嘅刀都有生銹嘅一日，正如《鐵人28號》嘅金田正太郎與28號呢對黃金拍檔，去到《超電動Robot．鐵人28號FX》（港譯《無敵大鐵人》）年代，都要交棒畀金田正人與28號FX，相信各位80後、以至90後嘅動畫迷都會記得啩！最近本土勢力ActionToys，就安排咗28號FX加入旗下嘅ES合金系列，以「含金量」高，又有合體加着燈等種種Gimmick，展現鐵人新姿彩。
ES合金《超電動Robot．鐵人28號FX》
售價：$480
「鳳凰」與28號FX結合後，就會變成飛行推進器，喺劇中28號FX全靠呢招，先可以殺上半空打敗黑牛。
鐵人17號「鳳凰」以膠料製成，雙翼有隱藏式展開機關。
換裝細Size嘅肩甲，就可以輕鬆舉臂扮大隻。
頸部內藏二段式關節，可以將大頭先拉出、再仰起，配合舉手甫士加拍攝角度，就能重現飛行英姿。
按住心口標誌後，就會有LED着燈效果，雙眼亦同步Light Up。
合金製雙腳用咗齒輪膝關節，扭動時會「格格」聲，玩落分外放心，留意膝蓋嘅內部細節都有細緻做工。
當年黑牛（左）跟鐵人28號FX（右）都齊齊出過電動合金玩具，依家喺二手市場依然有價有市。
食腦換件 擺靚靚甫士
有人話，依家香港消費能力直插谷底，嚴重影響市民生計喎，我又唔多覺囉，工一樣照返，落旺角彌敦道買玩具，一樣去到，如果唔係點會攞到呢款ES合金返嚟交稿？言歸正傳，筆者返到公司，拆盒一睇發現夠晒驚喜，事關機體嘅寶藍色烤漆裝甲，色澤跟足原著，而且唔會厚薄不均，QC實在唔錯。最抵讚係軀體以至雙腳都以Diecast亞鉛合金炮製，而且所有受力關節都內藏齒輪，墜手之餘又紮實，「含金量」勝過唔少日本合金玩具；再者腰間裙甲用咗全可動設計，令雙腿有超強嘅擺動幅度，紮馬出拳冇難度。至於劇中28號FX起動時，例必有舉高手臂扮大隻嘅有型甫士，照計頭大身細手又短嘅ES Q版合金好難扮得到，不過ActionToys冇向難度低頭，諗出用換件方式，只要改用細碼版肩甲，手肘照樣屈得起，香港人嘅智慧，問你服未？
鳳凰合體 有翼飛得起
無論係元祖嘅28號，定係接棒嘅28號FX，都係靠人類（操控者分別係金田正太郎與金田正人）操作遙控器起動，呢個Moment唔只會舉高手臂，雙眼與胸口標誌仲會發光，ES合金版本亦都跟到足，只要揭開額頭，放入三粒細餅電，再按住心口標誌，就會有LED着燈效果，而且亮度超高！不過玩家要留意身體至頭部位置，有電線焊接位置外露，扭動頭部時千祈咪用蠻力，以免令電線出現損毀。ES合金嘅另一賣點，就係可以同鐵人17號「鳳凰」合體，過程仲好簡單，只要將鳥頭收入背包，繼而掛喺28號FX嘅背脊，再用鳥爪嘅榫位鈎實即可，而且「鳳凰」以全塑料製作，結合時唔怕刮花28號FX，可以放心玩。
國寶級力作
《鐵人28號》可謂日本動漫界嘅國寶級機械人作品，歷史比《鐵甲萬能俠》以至《機動戰士高達》等更加悠久，原作者係橫山光輝，先於1958年發表咗首部同名漫畫作品，後來於1959年改編為廣播劇，之後再陸續製作成真人特攝劇、動畫及真人版電影。於1992年推出嘅《超電動Robot．鐵人28號FX》，算得上係「鐵人」系嘅第三部動畫作品，劇情銜接第一部，話說金田正太郎已經由細路仔變成人到中年嘅私家偵探，而鐵人28號亦都廉頗老矣，點算好？打擊罪惡、維護正義嘅責任，就交畀正太郎個仔金田正人，以及由「新．鐵人計劃」開發而成嘅鐵人28號FX接棒，延續年輕人拯救天下嘅故事骨幹。
查詢：2390 9843（ActionToys II）
