腳腳見骨PUMA X Ray Boot
波Boot七彩化已經係大勢所趨,同一鞋款,定時定候要有新色版本上架,先可以保持新鮮感,喺呢方面PUMA唔只玩得精,直頭係「癲」!除咗夏天出過BAPE X evoSPEED 1.2,依家歐洲各大聯賽已經開晒鑼,而evoSPEED亦都啱啱升級做1.3之際,唔只有紫色嘅大貨版本,仲有估你唔到嘅「X Ray Look」,着住佢,係想提醒對手唔好咁茅踩傷你,定係萬聖節就到所以應吓節先?
evoSPEED 1.3 XR FG $1,599(香港區限量10對,b)
唔只鞋面,就連前掌鞋底都印有五趾嘅骨骼紋理。
evoSPEED 5.3 IT $499(a)
evoSPEED 1.3 FG $1,299(a)
針對腳掌前後嘅唔同受力情況需要,鞋底前後便分別用咗Duoflex及PEBAX Speedtrack設計。
鞋身兩側嘅透明框架,就係發揮支撐作用嘅EVERFIT。
鞋舌兩邊設有透氣孔,可以加快排走鞋內嘅汗氣。
鞋頭上嘅一點點小方格,正係有防滑作用嘅Grip-Tex塗層。
踭位設有罩形穩定組件,高速轉向時便可發揮作用。
evoPOWER 4 TT $499(a)
evoPOWER 1 FG $1,299(a)
無論是圖中嘅evoPOWER 1 FG鞋墊,或者evoSPEED 1.3 FG版本,前後掌都加有EVA軟墊,發揮緩震作用。
鞋舌設有兩組泡綿墊位,索緊鞋帶後可以減少對腳背構成壓力,增加舒適性。
由鞋頭到腳背內側都設有AccuFoam泡綿,有助提升控球、射門與長傳嘅準確度。
鞋身內側設有Everfitcage,對腳弓位置帶來額外嘅支撐作用。
同屬曼城主將嘅阿古路(左)與耶耶托尼,分別係evoSPEED 1.3及evoPOWER 1嘅星級用家。
呢款「X Ray Look」波Boot嘅官方名稱係evoSPEED 1.3 XR FG,顧名思義係以出咗冇耐嘅evoSPEED 1.3為基礎,功能設計一模一樣,不過成個鞋面以白色做底色,最出位就係印上五趾嘅骨骼及肌腱紋理,由腳踭嘅跟骨、腳趾上段嘅跖骨,以及下段嘅趾骨都Show晒出嚟,似足照咗X Ray咁樣。呢款新Boot出位之餘仲係超限量,香港配額只有10對,由樂富廣場嘅SFALO獨家代售,對於唔罕有都唔儲嘅波Boot迷來說,呢款將成隻腳掌解構晒嘅evoSPEED又會唔會令你心癢?
evoSPEED減磅有分寸
如果嫌evoSPEED 1.3 XR FG太出位,又或者買到都唔捨得着嘅用家,冇有怕,因為大貨版嘅紫色evoSPEED 1.3 FG亦都上架有售,當然唔只得10對,唔使爭餐飽。evoSPEED系列專為速度型球員而設,最新版本嘅1.3亦唔例外,成對鞋都以輕量化設計為大前提,鞋面以極度微細的合成纖維製成,又輕又薄,而且鞋面力求無縫化,令球感可以快速、實在傳遞到腳掌上,高速盤球、扭波都更加有Feel。另一方面,雖然鞋面極盡平滑,睇落冇乜特色賣點,其實鞋頭已經加咗Grip-Tex塗層圖案,喺幾乎冇增加重量嘅情況下改善控球效果,雨戰之下都可發揮作用。除此之外,即使evoSPEED標榜輕量化,但未有盲目犧牲其他功能,鞋面兩側都有薄身而透明嘅EVERFIT框架,用嚟加強對中足嘅支撐力,踭位亦有罩形組件,為腳踭帶嚟穩定作用。鞋底方面,前掌就有Duoflex、中至後段配搭PEBAX Speedtrack板塊,加上易於轉向嘅圓形鞋釘,加速時就可提高反應及抗扭能力。
evoPOWER射波大大力
另一方面,今年初首度推出嘅evoPOWER,亦趁新球季換Look,將evoSPEED 1.3顏色搬過嚟,不過主客逆轉,改成黃色為主、紫色襯托,同樣Sharp醒!至於evoPOWER嘅銷售對象係一眾力量形球員,最大特色係鞋底設有G.S.F.彈性穩定支撐系統,令鞋底可以大幅度屈曲,射波時鞋形能夠緊貼腳形變化,將射門力度完完全全傳晒落個波度,唔似傳統鞋底因為太硬、太挺身,因而變得嘥力。雖然筆者唔係重炮型球員,不過都好鍾意着evoPOWER,因為整個鞋頭以至腳背內側都內藏AccuFoam泡綿,以First Touch形式接應高空波,可以發揮卸力作用,減少控甩腳嘅機會,而且凹凸形嘅鞋面亦可加強與足球嘅摩擦效果,提升射波以及長傳時嘅準確度,相當有用,唔怪得多位鍾意用遠射入波嘅球星,包括英超嘅耶耶托尼到德甲嘅馬高萊斯,都Mark實evoPOWER上陣啦!
查詢:
a.2332 7288(大埔超級城二樓B區PUMA Concept Store)
2295 0268(中環士丹利街卡佛大廈Futbol Trend)
2348 3555(銅鑼灣希雲街Elevens Group)
b.2242 7478(聯合道樂富廣場二期一樓SFALO)