Xperia Z3細節改良攝力提升

唔少大廠嘅新機推出周期係以年來計，既有時間研發新功能，又可以為用家帶來新鮮感。點知Sony偏偏唔跟章，今年2月先發布過Xperia Z2，大概半年時間就已經有後繼機Xperia Z3登場。雖然兩機相隔時間咁短，不過Z3依然有驚喜，不但設計更細緻，就連招牌拍攝功能都有所提升。

Xperia Z3 $5,998

備有5.2吋屏幕，不過亮度大幅提升，比Z2光猛得多。

「多相機」最多可用三部Xperia Z3於不同角度同步拍攝，畫面更可分割成不同形狀。

於黑暗紙箱下開啟最高ISO 12,800，仍然可以正常對焦拍攝，於低光環境拍攝好有用。

取消咗上代嘅AR效果，新「AR趣拍」就可以自行加入公仔、文字，更加互動。

預載Android 4.4作業系統，介面與Z2接近，不過圖示變大，睇得舒服啲。

支援播放無損音樂，樂迷實鍾意。

除了X-Reality for mobile技術之外，仲新加「超生動模式」，令顯示色彩更濃。

試行Benchmark，得分逾40,000分，效能唔錯。

與Z2（右）同樣用上雙面強化玻璃，不過Z3（左）邊位較貼，手感更好。

改用細卡nanoSIM，相信一般用家都需要換卡。

機側按鍵布局與Z2相似，實體快門鍵及金屬Power鍵都有齊。

正面睇Z3真係好似Z2，同樣採用雙面強化玻璃，不過細心留意，就會發現Z3大幅改良細節，好似四邊機側由上幾代方角平面改為圓弧形，而且玻璃機底完全貼近機側位置，令邊緣冇咁鎅手，手感好得多。此外，Z3個microUSB插頭及SIM卡槽嘅防水保護蓋都改成橢圓形，機側金屬Power鍵變大，配合更Slim嘅「三圍」以及更輕更薄嘅機身，整體設計再靚啲！最特別係以往Xperia Z系列必有紫色，Z3竟然冇，反而引入少有嘅金銅色及銀綠色，金屬感重，新鮮感十足。

三機過癮同步拍

Sony手機向來以影相作賣點，Z3照辦煮碗，用上2,070萬像素鏡頭，睇落好似冇咩大進步，原來功能上大幅提升，首先ISO感光度由上代最高ISO 6,400「升呢」至ISO 12,800，發布會上有個超黑紙箱試拍，一樣可以對焦拍攝，而且雜訊控制得相當唔錯。另外，除咗保留上代嘅「4K影片」、「TimeShift影片」、「背景散焦」等實用功能外，Z3仲加入多個新拍攝模式，好似「AR趣拍」及「正面特寫」，前者可以喺拍攝畫面上隨時加入文字及卡通圖案，物件仲會隨主體移動而放大、縮細；後者則可以同時用前後鏡頭拍攝，前鏡頭相框形狀仲可以任意轉換。玩味最勁就一定要數「多相機」，皆因用家可將最多三部Z3或指定手機透過NFC配對並連接，之後就可以從唔同角度同步拍攝，效果都幾似電影分鏡！

備雙SIM卡版本

規格方面，Z3同Z2一樣採用5.2吋Full HD屏幕，不過屏幕亮度就提升至600cd/m2，喺猛烈陽光下顯示自然清晰啲。此機內置Qualcomm Snapdragon 801 2.5GHz四核心處理器及3GB RAM，效能比上代輕微提升。比較特別是將會提供單SIM卡及雙SIM卡版本，前者對應FDD-LTE及TD-LTE兩種4G制式；後者提供Dual SIM功能，惟只支援FDD-LTE制式，各適其適。順帶一提，Z3支援24bit/192KHz無損音樂，鍾意聽歌必Like！