Honor X1養眼播片王

唔少人鍾情用Phablet，貪佢有個大芒睇片，又可以講電話。最近華為（Huawei）就有新Phablet Honor X1登場，佢搭載7吋IPS全高清大芒，用來睇片效果超正；當然唔少得就係支援4G制式以及通話功能，功能齊備。最抵讚係採用四核心處理器、2GB RAM等高效規格之同時，定價都只係二千五蚊鬆啲，屬抵玩之選！

Phablet Honor X1 $2,580

7吋屏幕解像度高達1,920×1,200，顯示好細緻。

只厚7.18mm，重239g，以7吋機來講唔算重型。

機背用上鋁合金物料，金屬感強。

跑Benchmark攞到兩萬分左右，以中價機而言，表現合格！

支援4G制式，仲可以Lock死4G，將手機當Pocket Wi-Fi用。

支援浮動按鈕，主頁、返回等常用按鍵用半圓介面顯示，仲可以隨時移動位置。

內置懸浮視窗，可以同時用小視窗開啟日曆、計數機、短訊等功能。

試片
上YouTube睇高清MV，可視角同飽和度都唔錯，效果一流。

有咁大個芒，梗係會經常用嚟煲劇同上網，屏幕質素自然係關鍵；Honor X1屏幕解像度就高達1,920×1,200，而且仲用上IPS素材，可視角達178度，側望屏幕都唔會出現偏色、反白等情況。機身設計方面，用上鋁合金物料，金感屬極濃；而且屏幕兩側邊框僅得2.99mm，加上屏幕佔機面表面積達80%，令機身未至於太闊，大部分人應可單手手持。順帶一提，機身設有雙咪高峰，有效降噪，令通話更清晰。

中階定價　規格強勁

雖然Honor X1定價屬中階，不過規格卻好對辦。佢搭載Hisilicon Kirin 910 1.6GHz四核心處理器、2GB RAM及16GB ROM，打機、睇片都好流暢，效能唔錯。Honor X1仲支援4G CAT 4制式，其理論下載速度可達150Mbps，上網同「單撈」Apps自然好爽手。另外，Honor X1亦搭載1,300萬像素F2.2大光圈鏡頭，聲控拍照、連拍、全景等基本功能當然有齊，最正就係有埋女士至Like嘅十級美顏，變身白滑索女都冇難度。

特大電池　反向充電

至於軟件方面，Honor X1預載Android 4.2 Jelly Bean作業系統，用上Emotion UI 2.0介面，廠方將介面特別調整，適合平板上使用，主頁每欄可以有五個圖示。此外，亦支援懸停手勢、懸浮視窗等功能，前者只要喺屏幕上凌空揈手就可以操作圖片庫及瀏覽器等功能；後者則可以用小視窗同時開啟日曆、計數機、短訊等功能，用落好方便。值得一提，此機除內置5,000mAh特大電池外，仲特別支援反向充電，只要用透過OTG線連接，就可以幫另一部裝置叉電，必要時可伸出友誼之手，幫吓手機冇電嘅朋友！