北京直擊：孖Note齊爆

北京國家體育館近排真墟冚，舉行完Meizu發布會翌日，就輪到Samsung搞年度發布會「Unpacked Event」。一如所料，Galaxy Note 4登場，屏幕、招牌S Pen以至鏡頭都有所升級；最令人驚喜係竟然同場推出Note系列新成員Note Edge，大玩曲面邊緣屏幕（Edge Screen），概念破格，今期最爆！

Note Edge屏幕一邊係正常平面，一邊玩曲面屏幕，廠方將常置屏幕底的工具列移至曲面位置。

屏幕採用防刮玻璃，另370萬像素前置鏡頭具廣角自拍功能，可藉拼相影出90度照片，大合照合用。

掃一掃曲屏部分就可轉換顯示內容，可快速開啟間尺、倒數時計、錄音等功能。

雖然部分改為曲屏，不過拎機時都唔會頂手，仲同Note 4一樣用金屬機框。

後置鏡頭具備1,600萬像素，更支援Smart OIS防手震。

新增「智能選擇」，可用方形工具截圖，而且可儲存最多十幅截圖一次過分享。

機面左下角輕觸鍵由功能鍵改為Recent Apps，程式列表亦改用立體設計，更可即時開啟多重視窗。

「隨心多窗口」可將屏幕一分為二，更可將程式縮細成圓形圖示或以浮動視窗顯示。

S Pen支援2,048級筆壓，書寫更靈敏。

同場加映
同場仲有新一代智能手錶Gear S，用上2吋曲面Super AMOLED，最特別是可插SIM卡，能用手錶通話，甚至透過虛擬鍵盤回覆短訊。

此乃與Swarovski合作推出的Note 4底殼同Gear S錶帶，閃爍動人。

只要將Note 4放入頭戴式顯示器Gear VR，再透過專用程式，即可營造出VR影院、360度全景及VR遊戲等效果。

Note Edge出位曲邊

講起彎芒手機，Samsung都出過部Galaxy Round。今次Note Edge又再玩彎芒，用上名為曲面邊緣屏幕（Edge Screen），其實係將其5.6吋屏幕右邊約8mm闊的部分設計成曲面，最特別係曲面位置可獨立顯示不同工具列，例如快捷功能、股價、天氣及未接來電、提示訊息，甚至可以玩遊戲或自訂走馬燈式金句，實用又過癮！精粹在於廠方會推出一個專用保護套，僅露出曲面部分，用家毋須全開屏幕即可睇時間、訊息等資料。

Note 4超清2K芒

Galaxy Note 4外形其實同Note 3都幾似，不過就改用金屬機框，至於仿皮背蓋物料就較厚身柔軟，整體手感更好，兼且有炭黑、白、銅金及粉紅四色可揀，而Home掣也加入了指紋掃描器。屏幕方面，依舊係5.7吋，解像度則提升到Quad HD 2,560×1,440，配合Super AMOLED，現場試玩可見屏幕鮮艷細緻，廠方指可顯示90%以上Adobe RGB色域。值得一提，新機雖然改用2K屏幕，好在有低功耗此特點，所以電池容積同上代接近，電池壽命反而可延長7%，長開屏幕煲劇最啱！處理器方面，就有四核和八核兩版本可選。

升級版S Pen

為用盡大芒，Note系列皆支援多重視窗，而Note 4更加引入全新「隨心多窗口」，除可將屏幕畫面上下分割，更可用Pop-up浮動視窗開啟程式，任你調校視窗大小及位置，而且仲可將程式縮成細細個圓形圖示，方便隨時打開又唔會阻住視線。講到Note系列，S Pen手寫筆亦係靈魂。今代S Pen支援2,048級筆壓，比上代1,024級筆壓足足提升一倍，壓力敏感度及反應都有所改善。另外，大家可用S Pen一次過儲存多幅截圖並分享到不同程式，亦可以好似Mouse般，拖放文字和圖片，又可將多幅圖片等內容一次過選取，配合原有《S Note》程式，記事用法多變。