經歷夏季淡靜期，9月起，遊戲界又開始活躍。首先出招係蟄伏多年、由EA Maxis開發的新一集PC模擬遊戲《The Sims 4》，相比2009年推出的《The Sims 3》，無論在操作上以至自主性方面都更上一層樓，可以用更加直覺方式去調控每個設定，就連好多機迷至愛─The Sims角色的死法都有新招！另外，任天堂同Sony都相繼有新搞作，機迷今個月應該有排忙！

今集創造角色夠容易，高矮肥瘦都可輕易做到。

可以直接用滑鼠拉動角色的五官來改變形狀，非常方便。

穿上太空衣去釣魚？《The Sims 4》可做出各種奇怪的有趣組合。

今集畫面表現進一步提升，社交活動亦更有趣。

遊戲預載了不少「罐頭」房間，揀啱成間買下即可，慳番唔少裝修同配搭時間。

今集加入了不少設計現代化的房子，亦可以簡單地改變屋子的圖則。

遊戲內少不免會同其他The Sims角色「溝通」一下。

Kali獲邀到澳洲悉尼參加《The Sims 4》試玩會。

Kali製造出《Guardians of the Galaxy》女角Gamora（右），望落都幾似樣。

Kali擺個BBQ爐畀The Sims角色玩，玩玩吓仲着火燒死埋！

試玩時全都用上印有The Sims鑽石標誌的耳機同滑鼠。

搞笑死法層出不窮

仲記得第一代《The Sims》在2000年推出時，確實非常震撼，亦開創出一種新遊戲模式。遊戲出到第四代，兼且時間過了十幾年，如果不跟隨現實世界改變的話都幾難立足，所以今集遊戲由外至內都特別針對現時遊戲潮流而設計，如遊戲角色已手機不離手，還會成日拍Selfie。大家會問：現實生活都過得咁艱難，點解仲要花時間「玩」多一個人生？無他，皆因可以在遊戲內做到現實做不到的事！例如好多玩家都鍾意在遊戲中整死自己所創造的角色，玩家仍舊可以將角色帶進房間後，拆除房門等角色餓死，或專登不斷亂搞電器引起火災燒死角色，此外，今集仲加入開心到笑死，非常搞鬼！要留意，今集初出時並未加入泳池，不知會否有「Die Hard」粉絲投訴不能浸死角色呢？

起屋造人容易就手

《The Sims 4》遊戲畫面大躍進，亦將創造角色及建築家居程序變得簡單。《The Sims 3》創造角色時，要將眼耳口鼻逐一拼貼在角色面上，想要做到跟自己或某特定人物好似樣，實在要花好多時間先得；今集只需用滑鼠從不同部位拉上拉下就能成形，甚至乎有藍色、綠色皮膚畀大家揀，整個阿凡達出來玩都得。除了外形，今集亦可自行設定角色的性格、行為及情緒。至於建築房屋方面，同樣可以用滑鼠輕易建設圖則及間隔，起好後只要有錢，都可用滑鼠拉大擴建房間。對於嫌麻煩的玩家，今集特地引進各式房間範本畀大家揀，亦可以將成間房拉到第二層樓或其他位置，唔怕「上屋搬下屋，唔見一籮穀」。

Kali悉尼試玩 讚介面夠User Friendly

遊戲剛在前日上市，原來在上市前一星期，EA特別在悉尼舉行亞太區試玩會，邀請了著名機迷同少部分亞太地區傳媒參與；玩了《The Sims》系列多年的本地著名女機迷Kali就有份出席，Kali對這款新遊戲大讚特讚：「新角色創造系統做到好User Friendly，遊戲設定比較西方，上一集要創造出一個亞洲人會比較困難，今集就容易好多，我仲一時興起整個綠色皮膚《Guardians of the Galaxy》女角Gamora，又真係整得好似！此外起樓容易咗，我仲特別為角色起咗間遊戲房，角色可以自己在房內玩到類似《PAD》嘅Mini Game，好抵死！遊戲製作人話如果角色遇到出其不意的情況，可能會笑死或傷心到死，我自己試玩時就拆咗間房隻門，等角色在『玩』BBQ爐時燒死。今次試玩時間只有90分鐘，好難試清楚成個遊戲，但暫時我都幾滿意，如果10分滿分，會畀9分！」

INFO

類型：模擬

開發：EA Maxis

平台：PC

推出日期：已推出

售價：$429

網址：www.origin.com/zh-hk/store/