被視為SHF嘅升級版本「真骨雕」，今年三月以Kabuto打頭陣，叫好又叫座，相信各位拉打迷都會認同︰有買貴無買錯，既然如此，再有拉打加盟「真骨雕」行列是常識吧！好彩廠方未有畀勝利衝昏頭腦，變成SHF大系咁濫竽充數，而係堅持慢工出細貨，即使接棒嘅響鬼等到今期先上架開售，不過當筆者試玩實物之後，老老實實，再等又何妨？

SHF MaskedRider Hibiki（Shinkocchou SeihouVersion）建議零售價︰$459.9

「音擊棒」可以換裝特效組件，傳神重現響鬼至叻嘅放火絕招。

由右腰嘅「音角」、左腰嘅「CD獸」到腰後嘅「音擊棒」，都可以換件形式掛上去。

Figure身形高度擬人化，而且關節上亦有細緻分件，大大減少SHF舊作嘅穿崩程度。

造型手掌總共有10隻之多，足以對應各種甫士需要，例如手持「音角」及「CD嚴」等Parts。

拆走腰帶正面嘅太鼓，就可換裝隨盒附有嘅三色「CD獸」。

響鬼係整個拉打族譜之中，少數冇複眼設計嘅角色，「真骨雕」版本就以漸變色呢招，高度還原原來嘅人設特色。

留意前臂都做足紅藍交界嘅漸變色效果，畀足心機。

肩甲關節與上臂相連，而非與上半身連接，藉此增加舉臂幅度。

想當初SHF啱啱面世，真係畀到拉打迷好大驚喜，當年市價$200樓下，就可以擁有一個靚靚仔仔又識郁嘅拉打Figure，尤其是複眼用透明膠件製造，又有唔同造型嘅手掌任換，加埋金屬腳掌呢招，邊有得輸，試問有幾多人可以買得晒每款12"拉打Figure？即使SHF唔夠6"高，但性價比已經贏晒！自此SHF就成為Bandai會生金蛋嘅鵝，唔只愈出愈多，甚至去到個個月有新貨，價位仲愈嚟愈高，不過質素上未有對等提升，最起碼Out咗金屬腳掌呢樣Gimmick已經抵鬧，久而久之，筆者都唔再款款中招，改為揀款嚟買，我諗有好多同道中人都會感同身受啩！

靚塗裝 還原漸變色效果

去到今年初知道廠方會喺SHF之上加推「真骨雕」，初時以為係Bandai改少少扮升級版，再發拉打財，好彩只是小人之心。原來係成個Body都重新製作，而且強調針對真人嘅身形特徵製作而成，所以全身比例更自然、更準確，首作Kabuto如是，依家嘅響鬼亦都一樣，最明顯係胸肌、三角肌及大髀等位置嘅曲線造型，就比以前嘅SHF版本順眼得多。除此之外，雕工方面都有大躍進，包括上肢嘅銀色外露肋骨、手帶、腰帶及腳帶等等都刻畫清晰。塗裝方面亦難以挑剔，響鬼嘅最大人設特色，就係身上嘅紫色部分有漸變效果，SHF「真骨雕」就喺底色上做足工夫，表面又上埋光澤Coating，令唔同位置嘅色調都有顯著嘅深淺分別，抵讚！

手多多 擺甫扮Chok更在行

造型攞高分之餘，附件方面都交足貨，首先造型手掌左右合共就有10隻之多，當中包括專為揸實「音擊棒」而設嘅款式，食指微微伸出，可以勾實棒上嘅細環。講到音擊棒，棒上嘅「鬼石」可以拆落嚟，換上火燄特效組件變成必殺技「音擊棒．烈火」嘅模樣，入型入格。至於變身道具「音角」，雖然受體積小巧所限，唔可以做到上下拉動機關，不過隨盒都有起動前後唔同形狀嘅音角道具，都算交到貨；另一重要法寶「CD獸」，就有紅、藍、綠三款，可以換件形式插入腰帶中央，美中不足是唔包變形後嘅CD獸形態，否則真係完完全全冇得輸。雖然廠方仲未公布第三款「真骨雕」拉打角色，筆者就衷心期望唔好急，最緊要靚，咁先對得住廣大拉打迷嘛！

查詢：2433 1828（瑞華行）