Nubia Z7 Mini出身大家族

國產手機品牌近幾年都好入屋，好似華為、中興、小米等等；其實除咗呢啲大牌子外，都仲有好幾個新興品牌崛起，其中Nubia就被唔少網民睇好！此品牌新機Z7 Mini日前有水貨到港，佢配備旗艦級嘅硬件，但就賣中階機嘅價錢，有啲睇頭咁喎！

採用幼邊框設計，單手拎機都冇問題。 $2,480

預載《Nubia牛盾》程式，會自動檢查及提醒用家有否開啟流量控制、手機防丟等設定。

內置多款主題，得閒換吓冇咁悶。

「易模式」將圖示簡化，啱晒長者。

有得用《Nubia視界》，玩法似足《Instagram》，不過就分晒類別。

原裝白色機背用上磨沙處理，仲有多色背殼可另購。其1,300萬像素拍攝效果唔錯，最正就係支援長曝及多重曝光。

有得拆殼，不過冇得換電；另支援雙卡雙待功能，雙卡槽均用microSIM。

嚴格而言，Nubia唔可以話係新品牌，皆因佢其實係中興（ZTE）嘅子品牌，所以唔少網民同用家都對佢特別有信心。另外，佢唔似其他國產品牌一味做平價搶市場，Nubia講到明只做高階手機，所以機能有一定保證。講番Z7 Mini，睇外形唔算突出，圓角直板機身，加上前黑後白設計，相當大路。唯一較能辨識就係機面輕觸鍵有個紅色圓圈，另外機背鏡頭位置都同樣加入紅圈，算係有少少點綴。原裝係得白色背殼，好在仲有黃、淺藍、青、粉紅多色背殼可以另購，49蚊人仔就可擁有，啱晒鍾意繽紛嘅用家。

頂班規格

規格就係此機最大賣點，搭載Snapdragon 801 2GHz四核心處理器、2GB RAM，亦支援microSD卡擴充容量，同Galaxy S5、HTC M8等手機同級；筆者試玩，撥頁、開Apps、上網都好流暢，亦可以輕鬆玩到Multi-tasking。可惜採用內置電池，而且電池容量只係得2,300mAh，高用量嘅用家睇怕都要外置充電池跟身喇！有彈亦有讚，佢同時支援WCDMA、TD-SCDMA、FDD-LTE以及TD-LTE制式，本地、內地嘅3G、4G網絡都啱用，成日中港兩邊走嘅用家最啱！

高清大芒

雖然型號名稱有「Mini」，不過喺呢個大芒年代，Z7 Mini個芒細極都有5吋；而其屏幕解像度亦高達1,920×1,080，顯示細緻，飽和度都唔錯，睇片夠用！另外亦內置1,300萬像素F2大光圈鏡頭，較特別係支援長曝以及多重曝光，可以影到星軌等靚相。軟件方面，Z7 Mini預載Android 4.4作業系統，並換上自家介面，將Android常見嘅AppDrawer功能表抽走，所有圖示都擺晒喺主頁，一般Android用家要適應吓。值得留意，因屬內地水貨關係，暫時只得簡體中文以及英文介面，稍為不便。