G Pad 8.0手機連動

LG近期頻頻出機，繼G3之後，南韓當地又發布一系列G3 A、G3 Cat 6等型號。除手機之外，原來LG都冇放鬆平板市場，最近就有新作G Pad 8.0，不單備有8吋IPS大芒，最吸引就係支援《QPair 2.0》，可以同手機玩連動，手機來電及SMS全部可以經平板回覆，平板亦可以與手機共享上網數據，就算只得Wi-Fi版本都一樣好用！

$1,798

內置16GB ROM，亦可外加記憶卡擴充容量。

機背設有雙喇叭，音量輸出都算大。

機身厚9.95mm，唔算薄切，不過僅重342g，都相當便攜。

機背有個500萬像素鏡頭，可惜不設閃光燈。

可以透過《QPair 2.0》將手機同平板連動，好實用！

支援多重視窗，畫面分割成兩部分，方便多工作業。

《QPair 2.0》可以在平板使用多個手機指定功能，包括接聽來電、回覆SMS等等。

來電時會彈出小視窗，直接接聽或者Cut線。

內置《Quick Memo+》，可以畫畫或者以文字輸入記事。

備有《Smart Cleaning》，自動清空記憶體。

試相
室內燈光下拍攝，對焦準確，不過雜訊偏多。

上年10月LG曾經推出過G Pad 8.3平板，雖然G Pad 8.0型號同G Pad 8.3好似，不過其定位較低，屬入門至中階級別。G Pad 8.0採用弧形上下及圓角設計，而且只提供黑、白兩色，明顯走大路穩陣路線；好在邊框都算幾窄，配合342g機身重量，一般男用家應該可以單手拎機。LG近年產品屏幕質素都出名掂，G Pad 8.0當然唔例外，備有8吋屏幕，雖然1,280×800解像度唔算標青，但就堅持用番IPS素材，色水、可視角都冇得彈，用來煲劇、打機都好Fit。

升級QPair功能

上年G Pad 8.3就首次玩《QPair》功能，今部G Pad 8.0更加升級至《QPair 2.0》。平板出廠已預載《QPair 2.0》程式，用家只要於其他Android手機上都安裝埋《QPair》程式，再透過藍芽將兩機配對，跟住就可以喺平板用到手機嘅指定功能，例如手機有來電、SMS、社交網絡有訊息時，平板都會同步作出提示，用家亦可直接喺平板上回覆；此外，亦支援「手機連接互聯網」，程式會直接Set晒密碼兼連埋線，超方便。而《QPair 2.0》最大升級就係上代來電時，只可以揀拒絕來電，今次就可以用平板上接聽，可惜平板冇聽筒，傾電話要用Speaker，帶定免提耳筒就少不免！

多工視窗夠實用

規格方面則屬入門級別，內置Qualcomm Snapdragon 400處理器及1GB RAM，亦可以外插記憶卡，上網、串流或者玩一般遊戲都冇問題。G Pad 8.0備有4,200mAh特大電池，玩足一日都唔使叉電。作業系統則沿用Android 4.2，介面則與G3相近，用上全新平面化設計，當然都支援飄浮視窗《QSlide》及畫畫記事之用嘅《Quick Memo+》，最實用就係支援多重視窗功能，可以將畫面分割，同時操作兩個不同嘅程式，包括Google Maps、Gmail、YouTube、Chrome、媒體匣等等，啱晒一心幾用嘅用家。