曲面電視靚畫對決LG 55EA9800 Vs Samsung UA55HU9800

達人G部電視開始追唔上潮流，行開AV店，一於問吓店長有乜推介，佢話：「識得睇，一定睇曲面電視！」雖然世界盃過咗，但換機潮仍然強勁，繼4K TV後，曲面電視最當旺。現時市面上只有LG及Samsung有出曲面電視，兩品牌都有55吋、售四萬多元嘅型號；當中LG 55EA9800採用OLED屏幕，暗位表現遠勝LED；至於Samsung UA55HU9800就採用4K屏幕，輪廓銳利細緻，究竟邊部正啲？即來個靚畫對決。

LG 55EA9800 $49,980

採用透明水晶座枱架，驟眼睇屏幕好似喺懸浮半空，兩邊設有陶瓷喇叭，音色通透自然。

Samsung UA55HU9800 $43,280

附設金屬座枱架，既型格又流線，但座枱架偏厚，令機身整體厚度增至307.9mm。

夜空位深黑結實，建築物的光位仍不減亮麗，顯示這類對比高的夜空風景畫面正是55EA9800之強項，完全是頂級Plasma TV水準。

用UA55HU9800播4K風景片段，藍天白雲的色彩變化好自然，無味精感，屋前掛起嘅衣服雖然又細又密，但輪廓仍保持銳利，並無模糊化。

OLED屏幕能將厚度大幅縮減，55EA9800機身厚度就只有4.3mm，放兩蚊硬幣比一比，就更清楚睇得出薄得幾誇張。

作為一部55吋電視機，UA55HU9800其實唔算太厚，只有約17mm，而且係用4K屏幕。

55EA9800網絡畫面分類清楚易睇，較特別係左上角會顯示電視畫面，用戶可以一邊睇電視一邊揀選應用程式打機睇片。

UA55HU9800可以將畫面一分為二，左邊睇片右邊上網，夠晒靈活，網頁中文顯示無亂碼，播片也流暢。

第1回合：鬥畫質及可視角度：DRAW

如果部電視係曲面，打斜睇時會唔會睇唔到？當然唔會，雖然兩機都冇公開可視角度數字，但經達人G觀察，兩部曲面電視可視角度均超過170度，一般平面電視可視角度大約係170度；就算傾斜5至6度觀賞，畫面都冇變色，對比度亦冇下降。畫質方面，55EA9800勝在暗位夠深黑結實，如果你睇開Plasma TV，嫌LED機暗位偏灰唔夠實的話，此機肯定係首選；至於UA55HU9800就勝在解像度夠高，接駁跟機UHD硬碟播4K電影時，輪廓位超銳利，色彩亦夠自然。

第2回合：鬥纖薄鬥慳位：55EA9800 Win！

買得OLED電視，除喜歡暗位夠實外，超纖薄機身亦係賣點。55EA9800就將機身厚度縮減至4.3mm，連跟機座枱架都採用晶瑩剔透水晶設計，驟眼睇屏幕好似懸浮半空，相當型格時尚，可惜唔可以掛牆，有辣有唔辣；而由於屏幕呈曲面，故連座枱架整體厚度都有192mm，預留位置放電視時要注意喇！至於UA55HU9800機身厚度就冇公開，達人G粗略度過，都起碼有17mm，連座枱架，整體厚度更達307.9mm，計慳位同纖薄型仔，未免稍為遜色。

第3回合：鬥上網方便：UA55HU9800 Win！

兩部電視都支援Wi-Fi無線上網，UA55HU9800可用遙控器按Smart，就自動進入網絡畫面，能經Apps上《Facebook》、《YouTube》同《東網電視》，進入Web Browser更能輸入關鍵字搜尋心水網頁，打字時仲會出現相關字，相當方便。達人G試入《on.cc東網》，中文顯示無亂碼，播片流暢無問題，而且可以將畫面一分為二，左邊睇片、右邊上網，夠晒靈活。而55EA9800上網都好流暢，進入Internet瀏覽網頁，輸入關鍵字時更有46種語言供選擇，但整體就不及UA55HU9800靈活同方便。

達人G結論：4K屏幕較抵玩

兩機無論喺外形、售價及尺寸都勢均力敵，但55EA9800屏幕解像度只達Full HD，始終係死穴。除非你對暗位表現有超執着情意結，又或者銀彈充裕，當日後4K藍光或串流技術成熟後，願意花多幾萬蚊換部4K曲面電視；否則擁有4K屏幕嘅UA55HU9800無疑較有優勢，當將來4K視訊選擇增多時，就可以透過曲面屏幕欣賞點對點4K畫質，而且同系列除咗55吋外，仲有65及78吋兩款，啱愛大畫面嘅影音迷。