Lumigon T2 HD丹麥靚機

以往提起丹麥，大部分人都會諗起Legoland或者著名景點美人魚雕像。以後講丹麥，可能會聯想埋智能手機，事關丹麥有個手機品牌新貴Lumigon，佢喺2009年成立，主力生產精品手機，之前推出嘅T1、T2都有唔錯嘅回響，最近就有新作T2 HD，玩不銹鋼機身，用料足，設計超型；加上規格不俗，絕對係品味之選！

$7,880

前鏡頭旁邊有LED燈，方便低光下自拍，圈示位置為ActionKey。

底座底部設有一排操控鍵，分別代表八個不同Behavior Control模式。

使用nanoSIM卡，而且要用特製工具先可以打開SIM卡槽，稍為不便。

底座都用上不銹鋼，足料又紮實；手機插入即可充電兼啟動預設Behavior Control功能。

機背反光塗層不易留下手指模；機側用上黑色橡膠物料，冇咁易跣手。

提供八個Behavior Control模式，可以獨立設定模式內容，方便將Dock擺喺唔同地方。

冇咩專用內置App，只有呢個《Lumigon》，實情係連上官網而已。

內置《TV》程式，可以將手機化身遙控器。

ActionKey可以設定多種功能，非常實用。

Lumigon嘅手機向來玩歐洲典雅風格，設計高貴得體，今年最新旗艦機T2 HD當然都跟番法則，雖然只係傳統直板方角設計，不過成個機身幾乎都用上不銹鋼物料，用料足秤；而銀色機身配合黑色按鍵及機側邊框，感覺型格大體！機身嘅不銹鋼位置經過多番打磨之餘，仲加入PVD鍍膜，亦換上Corning Gorilla Glass 3防刮玻璃，令機身同屏幕都冇咁易整花。

實用ActionKey

外觀就夠晒型仔，估唔到連功能都有睇頭。機身除電源、音量、主頁、實體快門鍵之外，機面近聽筒位置仲特別加入其他手機極少見嘅ActionKey實體鍵，用家可以自訂短按或長按嘅功能，例如開啟電筒、轉至震機或者啟動指定Apps；來電時又可以用來接聽或者即時靜音，通話時又可以即時開啟免提、Hold Call等，都好實用！另外，T2 HD亦備有過癮嘅Handwave功能，用家只要單手喺屏幕上面凌空揮動就可以啟動指定功能，好似接聽來電、睇相時轉相等等。值得一提，新機機底及機頂分別設有喇叭，唔單止音量輸出平均，原來仲支援Bang & Olufsen ICEpower音效技術，無論播歌定係睇片，效果都零舍正。

智能底座

T2 HD跟機除咗附送耳機及兩條頸繩外，仲有個不銹鋼圓形Dock。咪睇底座細細就以為淨係可以充電，其實佢內置「Behavior Control」功能，手機一插入底座就會即時轉換到指定模式，並啟動一系列預設功能，用家可以設定Wi-Fi、藍芽、數據連接、鬧鐘、提示燈號開關等，唔使慢慢撳，超智能。規格方面，此機只搭載Qualcomm Snapdragon 1.7GHz雙核心處理器，好在內置2GB RAM，整體操作流暢。另外亦支援800、1,800及2,600MHz三條4G頻譜，完美兼容香港4G網絡，上網唔會慢吞吞！值得一提，T2 HD支援防水防塵，雖然廠方冇列明防護規格，不過生活防水應該冇問題，唔覺意倒瀉水都唔驚整壞。