日本玩具品牌Takara Tomy嘅Tomica車仔大家就玩得多，近來仲出埋電子寵物，講緊嘅就係啱啱有水貨到港嘅「Omnibot Hello! Zoomer」。呢隻狗仔除咗識郁識碌之外，最勁就係識得聽幾十種指令，叫佢Sit Down、Lay Down都冇問題，玩味爆燈！

四肢採用滾輪設計，移動超快。 $1,880

雙眼會顯示Zoomer嘅心情狀態，相當互動。

要Zoomer聽指令，首先要輕按佢個頭，跟住佢雙眼就會顯示「？」，之後就可以講指令喇！

下巴位置設有喇叭，令Zoomer識得發聲。

咪高峰係喺Zoomer背脊，寧靜環境下聽指令都幾靈敏。

內置鋰電池，可以連續玩大約20分鐘；另設有A、B、C三個模式，前兩者為日文模式，後者則為英文模式。

尾巴前設有按鍵，一按Zoomer就會隨心所欲自顧自玩。

動作靈活

提起電子狗產品，相信大家都記得多年前Sony嘅AIBO系列，可惜價錢超貴兼玩法單一。同樣係日本出品嘅Zoomer就親民得多，二千蚊港紙有找，較多人可以消費得起。睇番外形，Zoomer似足斑點狗，四肢設有鉸位及滾輪，加上頸、腰、耳仔都有鉸位，令Zoomer狗仔可以做出移動、翻滾等不同動作，最犀利就係動作速度爽快，唔似得以往啲機械狗產品咁慢吞吞。

英日語聲控

要同Zoomer狗仔玩，主要係靠聲控指令，只要輕按Zoomer個頭，雙眼嘅LED就會亮起「？」圖示，跟手同佢講「Sit Down」、「Lay Down」、「Come Here」等指令，Zoomer就會吠叫或者跟指令做。Zoomer仲有個Training Mode，可以重複講指令等佢慢慢學習，之後指令成功率就會明顯提升。最正就係Zoomer雖然來自日本，不過就聽得明15句指定英文指令，如果大家識日文的話，仲有成30句指令可以用，相當犀利！

雙眼顯心情

現場試玩，Zoomer聆聽指令其實都幾準確，如果背景太嘈，Zoomer雙眼就會經常出現「X」圖示，代表聽唔明指令。而Zoomer胸前設有四個紅外線感應器，除咗令佢唔會撞牆之外，用家亦可以拎住個波喺佢面前郁吓或者揈手，Zoomer或者會回應你，不過成功率就比聲控低啲。冇指令時，Zoomer就會進入自動模式，隨意閒逛或瞓低，似足真狗仔。值得留意，Zoomer雙眼會表達心情，好似同佢講「I Love You」，Zoomer就會出現「心心眼」，勁可愛！

查詢：3102 2783