難求啞色版smart fortwo edition citybeam

變Look停不了嘅smart fortwo，今期又有新招，新版名為smart fortwo edition citybeam，車身換成金屬啞色設計，車廂就換咗專屬座椅，成個格調好似升咗幾級，潮得嚟又夠Grand，加上限量只有20輛，自然更具話題性，鍾意smart fortwo又唔想同人「撞色」嘅話，citybeam可會係你杯茶？

由於車身細細，連隨車尾置物量都相當有限，若然要多載行李嘅話，只好有技巧地將座椅稍稍前移，盡量偷位。

側鏡前方鑲有「citybeam」名牌，表明特別版嘅身份。

黑色仿皮座椅表面有白色間紋點綴，相當悅目。

車廂以黑色作主調，各式配置大致維持smart fortwo嘅原狀。

車身雖小，但係透過車頂嘅大天幕，有效增加車廂嘅開揚效果。

citybeam嘅雙色組合唔似以前咁「爆」，反傳統之下帶出和諧嘅新鮮感。

smart fortwo edition citybeam採用啞面碳灰色車身，襯上銀色安全車框，係smart首次採用嘅襯色配搭，唔似以往嘅smart仔一味追求撞色，反而多咗一分和諧感，加上啞面車身既特別又時尚，對於作風大膽、唔愛俗套嘅年輕車主而言，自然更具吸引力。

全新車廂色調

設計師亦喺車身細節上花咗唔少心思，好似頭燈換咗鈦灰色燈罩，內有LED日間行車燈，而A柱側鏡嘅前方位置，就鑲有citybeam嘅名牌，襯埋三幅式鋁合金輪圈，令整體外觀更見Sharp醒。至於車廂方面，以往嘅smart仔都係以鮮色為主，citybeam就改以黑色為主，座椅表面就披上仿皮，靠背以及座墊兩側就有白色間紋點綴，就連備有轉檔撥片嘅黑色軚環都有灰色縫線點綴，增加可觀性，而且為了標明特別版嘅Gimmick，全車地氈都印有「citybeam」字樣。

mhd幫手慳油

至於性能方面，smart fortwo edition citybeam以passion版本作基礎，動力來自1.0L直三引擎，馬力及扭力分別達71hp及9.4kgm，駕駛感受係點？由於smart fortwo採用後輪驅動，試過嘅朋友都知道佢好有「個性」，至於今代五速自動波嘅反應相當暢順，行駛時換檔動作唔算明顯，感覺上偏向舒適，而且為咗慳油，加裝咗mhd（micro hybrid drive）引擎自動熄火系統，當車速低於8km/h時會自動熄偈，當你短暫停車，例如喺燈位停一停、等一等嘅時候，就唔再有無謂嘅燃油消耗，而廠方公布嘅綜合耗油量介乎4.2-4.9L/100km，按目前油價計算，只係$0.7/km，仲唔算慳？