HTC One（E8）為自拍而生

Selfie（自拍）成風，不但被列入牛津字典，亦造就了炒至過萬元的自拍神器異常渴市。若閣下不想花大錢，又唔代表你不能女神上身；事關將於8月上市的HTC中階機One（E8）就是為了自拍而生，前置500萬像素鏡頭，美白、假大眼任你玩，毋須化妝也能瞬間即變萬人迷！

HTC One（E8）$3,998

厚9.85mm的機身唔算薄，幸好兩邊呈弧形，手感不俗。

採用nanoSIM，並兼容中港兩地網絡。

用上十級美白，加上少許大眼效果，執完女神即刻出現。

支援倒數自拍，但只得三秒，若長一點會更好。

屏幕有5吋，搭BoomSound喇叭，正面設計跟M8一樣。

備有自拍、攝錄、全景、雙鏡頭取景及Zoe動態相片等多個拍攝功能，拍友有排玩！

《AnTuTu》跑分有37,368分，比M8及S5等機王還要高，效能超卓。

保留BlinkFeed動態首頁，瞬間捕捉熱門新聞及社交網絡資訊。

支援LTE CAT.4制式，實測見下載速度高達70.44Mbps，堪稱極速！

Zoe功能會自動把相片及短片製成MV，效果有趣！

提供黑、白、紅三色，全部用上反光塑膠材質。

另設專用Dot View保護套，毋須揭蓋就睇到來電或SMS短訊。

改用塑膠材質

近年手機廠商都愛先出旗艦機，再陸續發展出一系列中階後繼機。HTC One（M8）幫HTC在今年第二季轉虧為盈，開了個靚頭，無理由不繼續下去，E8正是M8的降級版，驟眼睇兩者八成相似，同樣搭載5吋1,080p高清大芒，BoomSound雙前置喇叭的位置設計也一模一樣。然而，E8就將貨就價地把機殼由金屬改為塑膠，雖然專業味大減，又較容易印上手指模，但重量就得以偷輕，加上提供黑、白、紅三色，感覺比M8年輕。

支援十級美白

HTC One系列向以UltraPixel做賣點，但鏡頭像素只有400萬，用家評價一向兩極。來到E8，終於用回1,300萬像素鏡頭，支援F2.2大光圈之餘，仲對應1,080p Full HD錄影，夜晚影相拍片唔會比以前差。不得不提的，是前置鏡頭像素達500萬，高人一等，最正係提供埋一系列自拍「分唇」，例如美白、瘦面及大眼調校，另外又支援廣角及倒數時計。Model就話最Like佢每一項都有1至10級調校，慢慢執唔怕變公仔，佢就玩到唔捨得放手，相信其他姊妹都好難「幸免」！

中港兩地通行

規格方面，Qualcomm Snapdragon 801四核心處理器、2GB RAM、16GB ROM等都由M8移植過來，並行Android 4.4.2系統，配合Sense 6.0介面，舊擁躉不難適應。流暢感方面，E8亦取得極佳平衡，即使開盡WhatsApp、Facebook等大食Apps，整體操作都不覺遲緩，抵讚！另一要讚的是制式兼容度，原來此機除了香港網絡外，還支援內地通行的TD-SCDMA及TD-LTE網絡，北上也能用齊3G與4G，旅行出Trip都唔使換機！