最初知道《薩爾達傳說》會用「無雙」玩法時，對遊戲系統唔太擔心，反而驚角色同武器唔足夠，話晒有武將超多的《三國無雙》、《戰國無雙》跟超多機體的《高達無雙》珠玉在前啊！隨着推出日期臨近，愈來愈多資料公布下，角色、場景以至世界觀都算交到貨，連薩爾達公主都可以拎劍同指揮棒以華麗招式爽快殺敵，今個暑假以呢隻Game最有睇頭！

針對Boss的「弱點」攻擊，只要扣滿餅形計量器能源就能對Boss構成嚴重傷害。

林克會使出一系列火系魔法攻擊，包括魔法彈與火燄、火旋風及火球等等。

薩爾達公主都要自己親上戰場，出招效果相當華麗。

藥品這類道具係要靠寶石及素材調製而成。

手持「太刀」的海拉魯王國親衞隊隊長英帕，身手敏捷動作快速。

黑之魔女席亞是故事其中一個大魔頭。

場景設定都同原版《薩爾達傳說》相同。

延續原系列世界觀

《薩爾達無雙》主軸仍然係延續以往《薩爾達傳說》的世界觀，本身作為訓練兵的林克要救出被「黑之魔女席亞」囚禁的薩爾達公主，拯救海拉魯世界。林克在遊戲所用的武器，如盾牌、單手劍以及弓箭，都同以前角色設計冇太大分別，不過招式就華麗得多；而且當使用法杖時，更可以施展魔法攻擊，打到敵人着晒火，以一敵百話都無咁易！

參戰陣容暫未算多

薩爾達公主亦會親身上陣打怪，武器睇來弱弱哋，如用上短劍埋身打，靠靈巧刺殺配魔法及弓箭攻擊，但唔好因此睇小公主，皆因佢用指揮棒使出魔法時，效果都幾驚人。至於其他參戰陣容，尚有手持「太刀」的海拉魯王國親衞隊隊長英帕、《薩爾達傳說：天空之劍》中曾出場的劍之精靈法伊、白之魔女拉娜、黃昏公主米多娜及昆蟲王國的公主揚羽等等，暫時就只有這七位可操作角色。敵人陣營有黑之魔女席亞、影世界之僭王桑托以及覺醒炎翼龍外，仲有成身披上硬甲的巨型「被封閉之物」，硬攻唔得，記得要打佢腳趾呀！

掌握法門打大佬

要打低嘍囉做到幾百Hit其實唔難，如想打贏大佬，就要掌握幾個法則，首先要攻擊Boss的「弱點」，就是在Boss施展特定攻擊之後的「硬直時間」出招打佢；其次係唔好遺留地圖上的道具，如果執到「魔法壺」就可用「魔力解放」施展強大魔法攻擊；最後當然係要出超必！至於遊戲系統大致跟其他《無雙》系列接近，每一個角色都擁有等級，殺得多敵人，儲滿經驗值就可升級；另外在戰場上打低敵人會得到寶石同素材，可以用來製造徽章提升效果，要製作高效果的徽章，就要用到稀有素材。遊戲支援雙打，Wii U有一樣好，就係雙打時唔使用分割畫面顯示，其中一個玩家可以睇住部GamePad屏幕，大家都睇得清楚。

INFO

類型：動作

開發：TECMO KOEI Games

平台：Wii U

推出日期：8月14日

售價：¥7,390

查詢：2359 7998