相信唔少80後都會心有同感，細細個冇錢買POPY合金，想當年對住《六神合體》、《宇宙大帝》等玩具都得個「恨」字，大個仔賺到錢，就去買「笨大」嘅超合金魂緬懷童年，唯獨《百獸王》係個異例，事關呢齣由日本東映製作、1981年播映嘅動畫，之後被美國「World Events Productions」買咗版權，從此再冇日版玩具出過，經典合金亦成絕響。如今為咗慶祝美版動畫面世30周年，美廠Toynami就炮製百獸王紀念合金，行貨亦已經登陸香港。

Toynami《Voltron：Defender of The Universe》30周年紀念版
售價：$1,800

五獅逐隻睇
1號黑獅子

2號紅獅子

3號綠獅子

4號藍獅子

5號黃獅子

武器方面有十王劍及星形護盾，兩者都做足電鍍效果。

最有心思莫過於打開黑獅頭揭開機械人臉孔時，雙眼有發光LED效果。

說明書有英文詳盡介紹，講述美版卡通嘅故事大綱跟人物簡介。

30周年版本附有五把獅子專屬武器，仲有發聲效果嘅專用Display台座，插入中央鎖匙就成為發聲開關掣。

變形重點圖解
構成機械人主體嘅黑獅子，變身時先將前肢收入肩膀之內，再拉直後腿，繼而展開雙翼。

收好黃、藍雙獅嘅四肢，再仰起獅頭呈90度角，就變成百獸王嘅雙腳。

留意尾巴部分設有活門機關，插入黑獅子嘅後腿就會Lock實，唔會甩出嚟。

紅、綠雙獅嘅變形步驟好簡單，摺起四肢後，再拉出尾部插榫，安裝於黑獅子嘅膊頭即可。

日廠合金玩具嘅設計與生產技術都與時並進，如果你玩過新舊版本嘅六神合體就會知道，呢一點美廠未必間間做到。

造工懷舊風

好似今次Toynami嘅百獸王30周年紀念版，論技術及造型，都未能跟日廠相比，猶幸勝在夠懷舊Feel，質感亦好過自家推出嘅「膠版」20周年Version，例如分體狀態之下，五隻獅子嘅身體都有金屬塗裝，以及閃令令嘅銀色電鍍四肢，跟足當年POPY合金，而且身體材料全部由Diecast構造，足秤重手，未有偷工減料。30周年版本又為每隻獅子追加咗獨立武器，專門放喺獅口之中。此外，為咗令ABS四肢承托到沉重嘅軀體，大腿連接部分採用齒輪關節，小腿及腳掌嘅活動位就有螺絲加固，可以穩穩陣陣企定定擺甫士。

想當年五獅合體一幕，五色獅子從四方八面聚集起來，再撲上半空大結合，最後從黑獅子張開口露出機械人Golion臉孔，有邊個80後唔係睇到中晒毒？

合體變法跟原著

無論係30年前嘅POPY合金，或者今次嘅Toyami紀念版，變形機構都忠於原著，就係先將構成四肢嘅四隻獅子開始，收起其尾巴及四腿，再與黑獅子結合；而作為機械人身體及頭部嘅黑獅子，就將其前肢收入肩膀，再拉直後腿，之後展開背部飛翼，最後張開獅口，露出機械人臉孔便成事。由於玩具沿用大量金屬製造，故此合體時連接位嘅強度都有所調整，例如作為雙腳嘅藍獅子及黃獅子嘅屁股都有活門，插入黑獅子嘅後腿時就會自動Lock死，可惜接合度高但關節承托力欠奉企定定當然做到，但想穩陣地擺出攻擊甫士？筆者就勸你死咗條心啦！

查詢：2782 0366