拍住CR-V探索華文氣息

自從暑假開始，已經連續數個禮拜舉家去沙灘、遊船河，玩到有啲悶？好動過後，不妨轉轉主題，吸收一下文化氣息，今次我哋就拍住本田（Honda）CR-V到前荔枝角醫院，參觀活化過後變身而成嘅饒宗頤文化館，認識中華文化及香港歷史之餘，穿梭於多棟雙瓦頂古建築之間，享受恬靜嘅氛圍，正好讓飽受壓力嘅香港人好好舒懷。

從高處俯瞰館內嘅紅磚牆古建築，大有世外桃源嘅感覺。

藝術館內展出著名漢學家饒宗頤教授嘅多件藝術作品，令人大開眼界。

保育館內擺放咗一塊「九龍關地界」嘅複製石，勾起遊人認識香港開發史嘅興趣。

園內設有一家餐廳，參觀過後不妨內進吃High Tea。

車身如此大，後排嘅乘坐空間又點會令人失望。

軚環用上真皮包裹，背後設有加減波按鍵，增加駕駛上嘅自主性。

將後排收起，就可得出1,146L嘅大片置物空間。

車頂設有電動天窗，令車廂更見開揚。

雖然車身體積實在唔小，不過平均耗油量只有12.8km/L，節能表現有驚喜。

今代CR-V的造型更趨歐陸化，高身賣相更見台型。

饒宗頤文化館坐落於美孚與荔枝角之間嘅山崗上，由多棟單或雙層磚牆古建築群組成，喺「活化歷史建築夥伴計劃」之下被活化成與自然環境融合起嚟嘅文化園。館內本身不設公眾泊車位，自駕到訪的話，可先將座駕停泊於美荔道（保良局唐乃勤中學旁）或深旺道（九巴車廠旁）嘅露天停車場，之後步行約三至七分鐘就到達。

化身偽文青　走訪饒宗頤文化館

曾經先後成為清政府海關分廠、華工屯舍、檢疫站、監獄及醫院等唔同用途嘅饒宗頤文化館，擁有逾百年歷史，園內山崗仲完好保存咗一塊19世紀末清代時期嘅「九龍關地界」界石，不過出於保存文物考慮，唔會對外開放參觀。即使如此，大家仲可以喺保育館內一睹呢塊界石嘅複製品，以及從圖文之間了解呢塊界石原址上接近一個世紀嘅古建築群歷史，園內仲設有藝術館，展示著名漢學家饒宗頤教授嘅多項藝術作品，包括書法、字畫及水墨畫等，到此一遊，自可大大增進個人嘅文化氣息，想做「偽文青」者豈可不到？

大車身唔嘥油　低見12.8km/L

今次同行嘅CR-V實用之餘又慳油，正係出遊嘅最佳拍檔，車上擁有唔少窩心設計，好似後排座椅加入「一拉式」收摺功能，車尾載物空間可由原來嘅589L擴充至1,146L，加上車尾地台嘅離地距只有665mm，裝卸行李倍感輕鬆；筆者最鍾意係近乎直角嘅車門開啟幅度，加上後排乘坐空間夠晒闊落，接載家人或者朋友周圍去，上落車都唔使就住就住，包保冇投訴。性能方面，此車搭載2.4L直四i-VTEC引擎，馬力及扭力分別達190ps及22.6kgm，配合附設加減波功能嘅五前速自動波及適時四驅（Real Time AWD）系統，一般情況以前驅（FF）模式行車，只有遇上濕滑路面、上斜或加速時，Real Time AWD先會按實際需要將動力靈活分到後軸，令綜合耗油量可低見12.8km/L，以車身體積多達4,550×1,820×1,685mm（長×闊×高）嘅CR-V而言，都算慳足本分。