Grand SII LTE五制式全球通行

香港嘅4G網絡近年已經普及，最近就連內地嘅4G網絡都起動！可惜礙於制式唔同，想北上用4G的話，就連手機都要換埋，唔合乎經濟效益。中興（ZTE）啱啱推出嘅Grand SⅡ LTE就啱晒，皆因支援五大制式、共17條頻譜，無論香港、內地抑或出國外遊都一樣兼容到，真正全球通行！

Grand SⅡ LTE $2,499

支援多頻LTE，筆者在尖沙咀以《OFCA》測試，下載速度高達24Mbps，合格。

內置多種手勢操作，例如以三指同時向下掃就可以關閉程式，用落都幾方便。

PowerMO可以將屏幕畫面一分為二，同時操作兩個Apps。

備有5.5吋屏幕，全高清解像度顯示仲好清晰。

機背加入髮絲紋，驟眼睇都幾似Samsung Galaxy Note 2。

內置16GB ROM，亦可插記憶卡，擴充容量話咁易。

喺主頁向左橫掃就會進入Google Now頁面，可以搜尋資料以及查看天氣和位置。

講英文加上環境寧靜的話，語音控制都幾準確；不過環境比較嘈雜時，就會出現誤差。

機背加入仿碳纖花紋，摸上手有凹凸感。

現場有全新智能手帶Grand Band，可以量度步行距離及消耗卡路里等資料；機面備有LED燈顯示時間。
推出日期及售價待定

Blade Vec 4G $1,499
機身頂部及底部均採用弧形設計，手感不俗。

機價抵玩

這手機在內地型號叫做「天機」，雖然老套，不過確實勁好賣，其中一個主要原因就係規格夠強。單睇硬件，此機搭載Qualcomm Snapdragon 801 2.3GHz四核處理器，2GB RAM以及16GB ROM，而且仲備有一個5.5吋全高清屏幕，整體規格已經同市面上大部分嘅Android旗艦機睇齊，但計番機價，Grand SⅡ LTE定價只係$2,499，效能就直逼四、五千蚊嘅大廠機，性價比咁高，難怪大賣。

網絡高兼容

除咗效能勁，此機最大賣點其實係「5模17頻」。唔熟手機嘅可能會一頭霧水，其實係指佢支援GSM、WCDMA、TD-CDMA、FDD-LTE及TD-LTE五大制式共17條頻譜，簡單啲講，可以話兼容全球大部分嘅主流網絡，香港嘅2G、3G以及4G網絡固然用到；就連制式唔同、採用TD-WCDMA及TD-LTE嘅內地3G、4G網絡都難佢唔倒，網絡兼容度勁高！軟件方面，預載Android 4.3作業系統及自家介面，配合超勁嘅硬件，整體操作流暢；要讚就係內置PowerMO功能，可以將屏幕畫面一分為二操作兩隻Apps，用大芒玩Multi-tasking就最方便。

SPEC

Grand SⅡ LTE

制式：GSM、WCDMA、LTE

處理器：Qualcomm Snapdragon 801四核心

記憶體：2GB RAM/16GB ROM，支援microSD

屏幕：5.5吋（1,920×1,080解像度）

鏡頭：後置1,300萬像素、前置200萬像素

對外連接：Wi-Fi、藍芽、microUSB

電池容量：3,100mAh

作業系統：Android 4.3

體積：157×77.4×9.2mm

重量：173g

Blade Vec 4G平玩Nexus功能

ZTE同期推出另一新機Blade Vec 4G，咪以為佢千五蚊有找就乏善可陳，其實佢最大賣點係軟件，預載Android 4.4作業系統，亦係第一部採用Google Now Launcher 嘅非Nexus手機，介面似足原生Android咁簡約易用，最正就係支援語音控制功能，用家一講「OK Google」，手機就會開啟語音指令功能，可以即時喺Google搵資料，亦可以開啟及設定指定功能，好似撥號、鬧鐘等。值得一提，佢支援4G制式，入門機少有！