Xperia T3 7mm超薄

Sony Xperia手機一向以靚樣行先，不過採用多時的OmniBalance「全方位平衡」設計見慣見熟，確實開始有啲悶！有見及此，新出嘅Xperia T3就轉咗設計，改玩薄切，機身只厚7mm，配合不銹鋼機框，手感出奇地好。最正係定價三千元有找，但已經配備5.3吋大芒及四核心處理器，絕對抵玩！

Xperia T3 $2,998

機身厚度只有7mm，手感一流。

記憶卡及SIM卡槽均設有保護蓋，有效防塵。

喇叭位於機背底，可惜音量輸出一般。

機背採用磨沙物料，唔易跣手。800萬像素鏡頭，配合Exmor RS影像處理器，成像都唔錯。

備有5.3吋IPS屏幕，可視角不俗。z

內置多種拍攝模式，實用與好玩兼備。

備有「What's New」程式，自動幫用家揀出精選Apps。

加入多個貼心功能，例如貼近耳仔就可以接聽來電，好方便。

一般中價定位嘅手機，設計通常都會比較大路，但求穩陣。今次Xperia T3就唔同，Sony落足心機研究，特別用上不銹鋼機框，令機身可更加硬淨之餘，仲將厚度刻意偷薄，Sony話此機係全球最薄5.3吋智能手機。老實講，呢個名堂確實有啲取巧，不過以5.3吋大芒機嚟講，7mm機身厚度確實相當纖薄；配合148g重量，拎上手完全唔覺累贅。另外，機身亦採用一體成型設計，機背經磨沙處理，手感不俗。

備有高質屏幕

有個5.3吋大芒，當然要用嚟睇片。此機屏幕仲要係IPS，具720p解像度，廠方更加一次過移植晒Xperia Z2等旗艦機先有嘅TRILUMINOS display for mobile同埋Mobile BRAVIA Engine 2顯示技術，令顯示顏色自然，亮度、對比度、可視角都相當好，唔會輸蝕畀其他貴價型號。此外，Xperia T3支援800、900、1,800、2,100、2,600MHz五條LTE頻譜，用4G串流睇片都好爽快，上網唔使慢慢等。

可玩索爆自拍

至於規格方面，Xperia T3搭載Qualcomm Snapdragon 1.4 GHz四核心處理器及1GB RAM，亦可以加插microSD記憶卡擴充容量，效能屬中階級數。值得一提，佢備有800萬像素鏡頭，成像唔錯之外，亦支援多種拍攝效果，包括可以將卡通公仔同實境結合嘅「AR效果」、高速連拍嘅「Timeshift Burst」，而且仲有「實時美顏」，可以即時為人像加入美白、Smokey Eyes等化妝特效，女士至愛！