望見耳機上有大大個「三葉」標誌，唔通又係Sennheiser出品？非也，其實係Monster同adidas Originals合作推出的別注版耳機，款式夠潮兼大玩搶眼顏色配搭。先行到貨有綠紅、黃綠同白紅色，可能記者近期睇世界盃睇得太多，驟眼睇以為係墨西哥、巴西同英格蘭特別版添！唔啱心水？廠方就話遲啲仲會推出一款藍紅「法國色」，亦係筆者的Favourite！
$2,499
跟機附上印有adidas標誌的耳機袋。
耳罩部分可屈摺90度，方便收藏。
耳墊玩撞色，又有Monster Logo，Detail位都算做得唔錯。
「三間」加「三葉」標誌相信是此耳機的最大吸引力。
用上MusicShare Dual Ports設計，一方可輸入音訊，一方可作分享。
收音咪可作音量調節，配合iPhone使用最方便。
原來今年係Monster成立35周年，所以搵來adidas一齊推出別注耳機。這款別注版耳機由包裝盒、耳機保護袋到耳機設計都算做得一絲不苟，包裝盒上既印有「三間」，還配上adidas專用的藍色配色；印上「三葉」Logo的耳機保護袋防護力強之餘，亦唔算得上太累贅。
舒適人體工學設計
至於耳機外形設計方面，雖然整體感覺都比較「膠」，但也採用人體工學設計，佩戴起來都幾舒服；而且頭帶伸縮力強，即使頭大亦不怕出現過緊的情況。耳墊採用高密度海綿製造，能完全覆蓋耳朵之餘又唔會太焗耳。Detail位則做得幾細緻，頭帶頂部用上「三間」設計之餘，耳墊內部亦加入Monster Logo。
音色平均兼可同朋友Share
這耳機設有雙音頻接口，除了可用左方輸入音訊之外，只要在右方插孔插上耳機線，那便可將音樂分享畀其他朋友，這個名為「MusicShare」功能最多可將音樂分享畀五隻Monster耳機，大家可以一齊聽歌！此別注版本耳機是「Made for iPhone/iPod」，跟機設有連收音咪的線控，方便講電話之同時也可調節音量。至於音色又得唔得？官方並無列明耳機的規格，只表明是採用由Monster總裁Noel Lee親自調試的Pure Monster Sound技術，將音色調節成既平衡又具廣闊動態範圍。實際試聽過，感覺高、中、低音色表現確實幾平均，雖唔算太突出，但POP、R&B以及Vocal為主的音樂都總算駕馭得到，相信一心以「三葉」為首要考慮條件的用家應會收貨。
查詢：2998 3974
Brian
