HT 1/6 Mark XLI分拆上市
「分拆上市」係股市常見嘅財技，公司分拆再集資，業務更清晰，對散戶亦有吸引力，勢估唔到連Hot Toys都玩埋一份，唔通佢哋打算招股上市？其實講緊嘅係HT新推出嘅1/6 Iron Man Mark XLI，骨骼式裝甲本身已經夠晒Gimmick，最爆係整個Body可以分體出擊，又可以用磁石重組，話時話，呢招又幾似《Turn A Gundam》裏面嘅Mark X喎。
零售價︰$1,830
預訂價︰$1,790
推出日期︰明年第二至第三季
Body約高30cm，全身關節就有36個之多。
成個Figure可以被「肢解」分拆，變成六個組件獨立出擊。
一如以往嘅Iron Man，雙眼及心口反應器都內藏白光LED。
裝甲表面滿布機械紋理，走線極盡仔細，不過個人認為金色位嘅光澤度似乎太高，校番暗一啲會順眼啲。
腳背一樣大玩骨架Feel，機械迷見到一定畀Like！
手肘設有磁石，當前臂與上臂貼近時，就會自動啪埋。
Mark XLI喺戲中只係匆匆出現數秒，如今HT竟然連背脊結構都還原得到，佩服！
隨盒附有八枚噴火特效組件，不過用色以至造型都有啲似觔斗雲，神似與否見仁見智。
隨盒備有三對造型手掌，其中一對嘅手指備有可動設計。
破格！ 機械骷髏造型
雖然《Iron Man 3》都落咗畫一段時間，不過HT嘅1/6 Action Figure系列未有放慢落嚟，除咗早前公布、專為今年動漫節而設嘅Mark XX Python外，啱啱仲有Mark XLI Bones，數數手指，HT嘅《Iron Man 3》已經出到第10款了。Mark XLI以Bones為名，事關成個Body都以黑色做底色，再以金色勾勒出箇中嘅框架，至於黑色表面嘅機械零件及紋理，就好似人體骨骼一樣咁複雜糾結，與平時見慣見熟，充滿陽剛氣息嘅Iron Man相比，Mark XLI多咗一份鬼魅氣息。製作團隊不諱言指出，Mark XLI嘅結構極為複雜，他們要多次參考3D草圖，並且重溫電影尾段曇花一現嘅場景，先至成功實體化。
出位！ 分體六段出擊
有名你叫「Bones」，被煎皮「拆骨」是常識吧！HT Mark XLI另一破格之處，在於Figure嘅頭盔、胸口、手臂及腿部都可以獨立分拆出嚟，全部接合位有磁石加持，透過磁力即可重組，簡簡單單就模仿到Mark XLI嘅分體攻擊模式，試玩時確實幾有砌模型嘅感覺。HT亦表示現階段正研究會否為每一項組件提供獨立支架，若然最後效果發現美感欠奉嘅話，唔排除會取消呢個方案，到時點先可以擺出分件甫士，就要考玩家心機了！另一方面，試辦嘅磁石吸力未算太強，扭動關節時較易移位，不過HT已經承諾正式推出時會加強磁力解決問題，粉絲可以放心。至於Parts方面，Iron Man一向唔多，Mark XLI都唔例外，除咗有常規嘅裝甲地台及三對造型手掌外，就只有八枚對應分體時嘅噴火特效組件，只可以話喺意料之內，未算驚喜。
＊圖片所示仍屬產品原型，與最後完成品或有若干分別。
查詢︰3722 3988（旺角彌敦道信和中心20樓Secret Base）
