大約五、六年前，當筆者開始跌入Action Figure呢個深坑開始，已經好想擁有足球員Figure，相信大把身兼玩具迷及球迷嘅爸打都有同感，等吓等吓，當筆者都打算死心之際，ZCWO竟然攞到曼聯「拉臣」，一出就係我至愛嘅傑斯（Ryan Giggs），多年夙願得以實現，心情就早前公投有近80萬同道人一樣咁High！原來驚喜仲未完，同曼聯一樣人氣大熱嘅巴塞隆拿，正式成為ZCWO足球系列嘅第二梯隊，打頭陣嘅仲係當今球王美斯（Messi），以及鐵血隊長佩奧爾（Puyol），對各位志同道合者而言，笑住破財又何妨。

除有主場球衣，隨盒還有球會訓練套裝，得出兩款造型。

新頭雕唔只冇晒Baby Fat，而且一啲都唔似張家輝，同試辦相比明顯進步咗。

佩奧爾從來唔玩Chok Look，ZCWO就準確掌握到呢位老隊長嘅滄桑感覺，面上嘅歲月痕迹可見一斑。

今次一併推出美斯及佩奧爾Figure，不禁令人聯想到，巴塞的確係時候改朝換代了。

除咗隊徽花咗好多心機，而且整件波衫嘅雙色間紋，以至心口嘅贊助商標誌，都有好高嘅完成度。

就連球衣號碼及球員名字，賣相以至質感都似足現實中嘅熨字，抵讚！

關節數量充足，而且相當實淨、夠力，加埋素體內藏磁石呢招Gimmick，擺各式足球甫士都夠晒入戲。

訂購者可以優惠價同場訂購嘅同款素體，不連頭雕，留意波Boot款式與主體Figure有所不同。

每套都跟有一個內藏磁石嘅白色足球，成功喺動漫節之前預訂優先限量版嘅話，再送黃色足球及隊長臂章。

雖則話香港人對英國波情有獨鍾，不過多得愈嚟愈多直播賽事帶挈，令大家都睇多咗唔同地方嘅聯賽，實力、星味、戰績兼備嘅巴塞，自然深得港人喜愛，何況仲有球王美斯做Icon，ZCWO嘅負責人Simon亦直言，無論從個人喜好以至商業角度出發，巴塞都係繼曼聯之後最佳嘅Figure化題材。貴為球王，出美斯自然係大熱之選，何解星味稍遜嘅佩奧爾都會有份打頭陣？Simon解釋說︰「佩奧爾同傑斯好似，兩者對球會都係從一而終，冇轉過會，而且佩奧爾仲做咗好多年嘅巴塞隊長，係球隊嘅靈魂人物。去年我哋初步同巴塞接觸，表達想出佩奧爾Figure嘅意願冇幾耐，就傳出佢退役嘅消息，更加令我哋下定決心要幫佢出Figure，因為等到佢唔再係球員時先Take Action嘅話，版權上會有好多問題，如今呢位隊長落實咗喺巴塞退役嘅決定，證明咗我哋當初想法正確。」咁講法，佩奧爾Figure Take Two嘅機會相信微乎其微，作為呢位鐵血隊長嘅忠實粉絲，今次就要把握機會了，有今生、冇來世呀！

頭雕歷盡艱辛

或者你未必認為ZCWO有驚天地泣鬼神嘅功力，不過佢哋敢做第一人、率先推出球星Figure呢份勇氣，已經值得高度認同，而且吸收過曼聯六子嘅經驗後，今次嘅巴塞Figure質素的確再有進步。記性好嘅爸打，應該記得幾個月前ZCWO發表過一張美斯頭雕嘅初辦相片，Feedback好壞參半，彈者就認為面相太稚氣，甚至有啲Baby Fat，Simon回顧呢段艱苦歲月表示︰「製作美斯頭雕前前後後用咗四、五個月時間，真係好難做、試咗好多次，因為佢嘅面相輪廓唔算突出，而且喺唔同成長階段都有變化，例如初出道時有少少肥，近年就明顯清秀咗，所以喺唔同人嘅心目中，都有各自最深刻嘅形象，好難憑一個Look就取悅到所有人。既然今次我哋以2013至14嘅球季作為造型藍本，所以決定用較近期嘅美斯造型，面頰、下巴明顯尖咗，製作時同雕刻師又有頻密溝通，亦多得好多粉絲畀意見，先至做出依家嘅效果。」相對而言，Simon坦言佩奧爾嘅頭雕就較易拿捏，因為佢嘅面相特徵相當突出，例如標誌性嘅長頭髮，仲有効力巴塞長達15年，面上掩蓋不了嘅滄桑感覺。近距離觀察過後，個人認為喺雕工及塗裝嘅仔細度，巴塞新作都比曼聯Figure再有進步，尤其是美斯嘅「三七面」就最神似，絕對冇走樣變咗張家輝，至於佩奧爾深深嘅法令紋正好畫龍點睛，話晒隊長已經30有6，同美斯拍埋一齊，不禁令人想到巴塞嘅精神領袖一職，確係時候要有新人接棒了。

隊徽有玄機

接觸曼聯Figure嘅玩家，相信都會認同ZCWO喺素體、服飾及配件方面的確畀足誠意，好似素體與足球都內藏磁石，令玩家毋須出動「補貼」，都可擺出心口及腳面控波等傳神動作，至於2 in 1嘅底座，表面印有球會隊徽之餘，而且揭起面板，內藏仿真草地台，加上支架亦有磁石，可以撐實Figure背部，令玩家更易Display，以上嘅種種好設計，巴塞版Figure當然統統有齊。至於球衣方面，Simon表示比曼聯波衫更難做，雙色間紋當然比曼聯嘅淨色設計多花工夫，不過Simon話最惡搞竟然係仲細過一毫子嘅隊徽，他說︰「巴塞嘅隊徽比曼聯嘅紅魔鬼複雜得多，有好多細Pattern，最困難係配色多達七至八種，我哋試過多種方法，例如電腦打印、熨章，發現效果都唔理想，因為熨章容易脫落，顏色又易反底；打印嘅話密度又未夠高，最終我哋用咗新方法，工序上相當花時間。」咁講法，玩家記住要落足眼力睇清楚了！

後記：好波陸續來

訪問尾段筆者不斷向Simon窮追猛打，希望他透露巴塞系Figure仲會唔會有第三款，結果Simon終於露口風，原來人選已經確定咗，正係呼之欲出嘅巴西新球王尼馬（Neymar），Simon仲話繼曼聯、巴塞之後，亦都部署緊第三支球隊Figure化，不過到底係邊隊，佢就守口如瓶，只肯講順利嘅話會喺年尾正式公布，Anyway，鍾意球星Figure嘅各位爸打，記住等睇好戲了！

優先預訂有禮送

今次嘅巴塞雙星Figure屬於「2014香港動漫電玩節限量版」，除咗喺場內接受訂購外，ZCWO亦預留咗每款200套畀非VIP玩家，率先由即日起喺旺角兆萬中心嘅「超人玩具」接受預訂，仲會加送隊長臂章及一個黃色足球，預計喺動漫節期間就可以到ZCWO嘅攤位收貨，每套售$1,480，預訂時需繳付現金$500。另一方面，同場仲可以優惠價$350（需付全額）訂購同款素體一個（唔連頭雕），有關詳情可到ZCWO嘅官網或facebook專頁瀏覽。

網址︰www.zcwo.com.hk　

facebook專頁︰www.facebook.com/ZCWORLDHK　

查詢︰2366 2688、2366 2396（超人玩具）