間間廠商都推出藍芽喇叭，證明有市場啦！皆因好多後生仔女都會買番個帶去沙灘玩，平時在屋企聽歌亦得。Sony剛剛推出三款新型號藍芽喇叭SRS-X3、SRS-X2及SRS-X1，靚聲易用的首選SRS-X3，想玩水就要SRS-X1，拎出街使用都好方便，難怪之前日本偶像組合Cheeky Parade來香港表演時，Sony特登搵佢哋拎住做宣傳！

SRS-X1有四色選擇，合IPX7/IPX5防水標準。

單元向上發聲，能做到360度環繞聲效果；但若然單元振膜沾水的話，其實都幾難抹乾。

SRS-X2
採用藥丸形設計的SRS-X2，機面微微向上翹起，有助發聲。

相對下，SRS-X2的操作鍵介面略較SRS-X3簡單。

SRS-X3採用型格簡約的「Definitive Outline」設計。

機身採用長方體設計，每個平面之間設有斜面，能減低聲音回彈干擾。

雖然SRS-X3係三款新藍芽喇叭仔中最大的一款，但機身只比一隻手掌大小小。

雖採用實體鍵，但卻巧妙地隱藏在機面之上。

Cheeky Parade拎住喇叭擺甫士。

NWZ-W273S推出兩款限量金屬色系新版本，擁有出色防水性能。 各$750

SRS-X1追加防水沖涼照聽

球形設計的SRS-X1似曾相識？查實這個直徑約78mm的藍芽喇叭在外形上是承襲前作BTV-5，可以360度環繞發聲，而兩者最大分別係SRS-X1新增防水功能，防水級別達到IPX7/IPX5。即係有幾防水？一般放在泳池邊、廚房或戶外使用自然可以，Sony仲話拎入沖涼房經藍芽播歌都無問題；記者試過用噴壺向SRS-X1直接噴水都仍然可以照用，但要將積聚在振膜的水珠抹走就有難度。SRS-X1提供黑、粉紅、紫及白色四種選擇，如果一對買的話，更可分開左右聲道輸出，營造立體聲。

SPEC

體積：78×80.5×78mm

重量：185g

售價：$880/隻、$1,280/對

SRS-X2適合戶外使用

論功能及規格，SRS-X2跟SRS-X3其實差唔多，但外形設計由方形轉成藥丸形，而尺寸亦較細，比較容易帶到戶外使用。SRS-X2備有ClearAudio+模式配搭Sony專業音效優化技術，音色還算不錯。值得留意是喇叭前方出聲位是微微向上翹起，發聲角度會更廣闊，有助在空曠的大環境下使用。

SPEC

體積：60.5×171×56.5mm

重量：500g

售價：待定

SRS-X3特別設計保靚聲

SRS-X3用上12條線勾勒、玩簡約輪廓「Definitive Outline」設計，相比同系列可對應Hi-Res Audio的SRS-X9或SRS-X5，SRS-X3就是最細、最輕巧的一款，機身只重850g。「Definitive Outline」設計特別在機身六個平面之間加入小斜面，除了改善觀感外，亦能減低喇叭發聲時撞擊到機身邊緣位置所產生的回彈干擾，令音色更清澈。SRS-X3配備兩個10W喇叭及Dual Passive Radiator，足可輸出圓渾厚實的重低音；另外喇叭還結合ClearAudio+技術及數碼音訊處理技術，音效精準、清脆。接駁上相當簡單，用藍芽或NFC就可將手機或音樂播放器連接喇叭，如果以USB線連到喇叭的話，便可在播歌的同時為手機或播放器充電。

SPEC

體積：185×67×66mm

重量：850g

售價：待定

防水NWZ-W273S推出兩款限量金屬色

新產品不單止藍芽喇叭，連防水Walkman都有新款，不過只係原有的NWZ-W273S推出金屬黑色及金屬紅色限量版。相比用色鮮艷的原版，兩款限量金屬色版本都明顯較高貴，而且亦具備IPX5/IPX8防水等級，重量為29g，跑步時唔怕滲汗之餘，如果換上游水專用耳塞的話，直情可以戴住嚟游水！新版NWZ-W273S內置4GB容量，可將Windows Media Player及iTunes的播放列表同步更新到Walkman之上。另外完全充電只需1.5小時，就可用足8小時，如快叉3分鐘都可播放60分鐘，臨出門口先發覺無電都冇有怕。

查詢：2345 2966