合家歡Touran GT探訪美荷樓

過埋六月尾，莘莘學子就考完試，家長終於可以鬆口氣，不妨同仔女出街抖抖氣。天時暑熱唔想山長水遠揸車入新界，其實九龍都有唔少好去處，呢次我哋就拍住Volkswagen Touran GT，去到石硤尾美荷樓參觀，認識昔日石硤尾居民嘅生活點滴之餘，兼可明白活化歷史建築嘅意義。

Touran GT

80年代美荷樓被編為石硤尾邨的第41座公屋，大廈外牆就有清晰嘅識別號碼。

見到呢啲懷舊糖果，相信會勾起唔少港人嘅童年回憶。

閣仔及帆布床，都係50年代公屋居民家家戶戶嘅常見布置。

狹窄嘅「騎樓」設計，常常出現於舊式公屋之內，美荷樓都唔例外。

寬敞嘅中排空間，加埋大天窗，乘坐感受分外寫意。

只要拉下設於中排嘅手柄，就可將中排椅背靠前，方便後排乘客進出。

三幅式皮革軚環附有金屬裝飾，背後就有加減波按鍵。

雙離合器DSG波箱，轉檔反應比手波仲要快。

將後排收起，就可大幅擴充車尾嘅置物量。

引擎容積雖小，但Touran GT擁有令人驚喜嘅車廂空間及性能表現，切合小家庭嘅實際需要。

早喺上世紀50年代建成嘅香港第一代公屋美荷樓，坐落於石硤尾巴域街一處小山坡上，透過「活化歷史建築伙伴計劃」，已被活化成一座附設美荷樓生活館嘅YHA美荷樓青年旅舍。不過呢度不設停車場，自駕前往嘅話，可以先將座駕泊於石硤尾邨嘅時租停車場，步行數分鐘即達。

體會基層生活文化

美荷樓生活館內現正舉行以50至80年代石硤尾徙置區為主題嘅「美荷樓記」展覽，透過逾千件展品，包括當時嘅家具及生活用品，加埋老街坊口述歷史嘅資料、逼真嘅模型、黑白舊照片印製嘅展板，以及多個模擬唔同年代美荷樓住宅特色嘅「示範單位」，讓遊人了解舊香港基層人士嘅生活面貌。參觀完後，仲可以到「呼吸士多」選購已經買少見少嘅小玩意，例如鐵皮玩具、竹蜻蜓及發泡膠飛機等，店內仲有懷舊零食專區，特別採用舊式士多嘅大玻璃樽盛載糖果及零食，之後再到對面嘅「呼吸冰室」歎杯香濃咖啡，度過一個懶洋洋嘅下午。

全面上鎖家長放心

至於今次同行嘅Volkswagen Touran GT，搭載1.4L雙增壓（Turbo加Supercharger）引擎，馬力及扭力分別為170ps及24.5kgm，力量比唔少2.0L車種仲要出色，配合七前速DSG波箱，公路上以七檔低轉行車，提供平順嘅乘坐感受之餘，亦有助節省燃油，綜合耗油量就只有6.6L/100km。雖然車身高度達1,674mm，但每次入彎出彎，紮實嘅車架都帶嚟精準穩定嘅掟彎表現，歐洲車嘅鋼水果然唔同啲。

Touran GT係一款主打小家庭嘅MPV，車廂用咗2+3+2靈活座椅布局，無論乘客進出車廂，還者收起座椅增加置物量，都只需幾個簡單步驟就成事，例如輕拉椅背機關，即可將後排放平，增加車尾嘅置物量。至於安全設計方面，一般汽車嘅兒童鎖都係「鎖外」唔「鎖內」，不過Touran GT嘅車主只需一個掣，就可以將車門及車窗完全鎖上，避免「百厭仔」手多多拉起門柄打開車門，夠細心。