CAT B15天地任我行

CAT（Caterpillar Inc.）本身係生產挖土機、鏟泥車等工業機械及車輛，亦有用CAT呢個牌頭推出Work Boots；唔講唔知，CAT原來仲有出手機！繼B10、B25等型號之後，早前就有新機B15報到。一如品牌陽剛形象，新機繼續玩Tough，八角形機身全部由橡膠、鋁、防刮玻璃等超硬淨物料製作，防水、防塵又防摔，幾惡劣嘅環境都冇有怕！

CAT B15 $3,288

機面採用強化玻璃，唔黐芒貼都唔驚整花。

背蓋有凹凸坑紋，手感唔錯；不過邊位好易藏污，插沙之後要細心清洗。

備有500萬像素鏡頭，不過成像只屬一般，幸好都提供HDR、濾鏡等功能。

右邊機側設有三粒黃色按鍵，左右為音量鍵，中間則為相機鍵。

機背蓋特別加設安全鎖，就算跌機都唔會甩蓋，好實淨。

microUSB等插口都加入保護蓋，有效防水、防塵。

備有雙卡雙待功能，亦可以加記憶卡擴充容量。

串流YouTube高清MV流暢，可惜受屏幕解像度所限，顯示未夠細緻。

試行Benchmark，雙核心處理器只得唔夠9,000分，效能一般。

內置《CAT Used》，提供一系列CAT工業產品資料。

預載「SIM Management」，可以設定上網、撥號嘅主卡。

《Catphones》會直接連CAT手機主頁，提供說明書等產品資料。

物料足秤

CAT的大部分出品都係專為地盤等環境而設，設計當然要堅硬耐用，手機當然都唔例外。第一眼睇見B15，已被其八角形設計所吸引，原來用料仲相當堅，好似機面就特別換上Corning強化玻璃，減低刮花屏幕嘅機會；而機側上下部分就用上橡膠圍邊，左右兩邊就換上鋁，加上每邊各有三粒螺絲上實，跌落地都唔怕撞崩刮花。而機背蓋除咗有大大個「CAT」Logo之外，更壓上超深嘅凹凸坑紋，手濕都唔會跣手！雖然用料紮實，不過其實機身尺寸合理，重量亦只係得170g，拎上手唔會嫌佢笨重。

超強防護

此機防護功能真係超班，先講防水，佢支援IP67防水防塵標準，可以於一米水深正常操作30分鐘；而且仲具備一般手機少見嘅防摔效果，官方數據就話1.8米高空墜落水泥地都冇問題。小記現場測試，發現一米多高跌落地，手機操作正常；最正就係因為機身組件鑲嵌緊密，所以唔會好似其他手機咁一跌即爆殼或解體。為咗展示此機有幾實淨，廠方特別拍咗條片，將B15掟落地同水池，之後又用架多用途鏟車輾過600部排列整齊嘅B15，最後手機絲毫無損！（睇片請上：www.cat.com/builtforit）

規格一般

為有效保護手機，B15嘅microUSB、耳機等對外連接介面都配備軟膠保護蓋，機背殼亦設有安全鎖，防止沙泥及水氣入機。另外，廠商亦預計用家周不時會出入惡劣環境，難免大汗濕身，所以B15就備有濕手指操控及獨立快門鍵，前者就算手濕都唔會影響篤芒、掃芒；後者就於機側兩個音量鍵中間設有實體功能鍵，着機下長按就可以啟動相機，拍攝時亦可當埋快門咁用，夠晒貼心。硬件方面，則屬入門級，4吋屏幕解像度得800×480、用1GHz雙核心處理器以及512MB RAM，加埋個Android 4.1.2作業系統，規格唔算吸引；幸好一般睇片、操作都唔會好Lag，而且廠方仲保證日後會提供Android 4.4升級。