今屆世界盃認真鬥得燦爛,好睇嘅地方,唔只驚人賽果連環爆,就連唔同牌子嘅波Boot都鬥到七彩,除咗三間牌玩黑白配、剔牌就紅黃分明之餘,PUMA Tricks玩得更絕,實行左右腳鴛鴦色,高收視到連電視台旁述都三番四次提起,不過就誤會咗以為係球員專登咁襯囉!Well,姑勿論如何,PUMA今次唔只贏盡Noise,而且仲有後着,就係融入巴西地道文化嘅evoPOWER 1 Graphic FG,今日起在港開售,配色更加大膽,而且全港只有20對,又再食住世界盃個勢做風頭躉!

赤足設計嘅精髓所在,就係鞋底嘅G.S.F.,呢排好似魚骨咁樣嘅裝置,令鞋底可以隨射波動作而作出一定程度嘅屈曲,減少力量流失。

鞋頭遍布方塊形嘅AccuFoam泡棉,藉此增加觸球時嘅準確度。

鞋面雖薄,但係透過EverFit Cage,仍可提供充足嘅支撐效果。

evoPOWER系列備有多個檔次版本,數字愈細,規格愈高,最頂級就係evoPOWER 1。

鞋尾與鞋袋都有「Que emocionante uma partida de futebol」嘅Grafitti字樣,鞋尾嘅黑色位置仲充滿光澤,遠睇仲以為係碳纖。

巴西唔少基層社區嘅建築物,都會塗成七彩模樣,令整個社區都瀰漫歡欣氣氛。

鞋墊用色唔只與鞋面相呼應,仲畫成巴西基層社區嘅模樣,加倍貼題。

evoPOWER 1 Graphic FG $1,499(即日起於指定門市發售,全港只限20對。)

地道森巴式設計

雖然evoPOWER出咗只有半年左右,不過已經做到百變Look,由巴洛迪利專用嘅「剪報版」Stampa,再到極限量嘅迷彩版Camo,以及公開發售的橙色版,仲有專為世界盃而設嘅鴛鴦色Tricks,就好似Figure界嘅Bearbrick咁樣成為萬能Key。至於最新面世嘅evoPOWER 1 Graphic FG,顏色相當Colorful,由橙、紅、藍、黃、黑拼貼而成,唔只充滿森巴文化嘅歡欣氣息,設計理念仲好地道。

宣示足球令人興奮

眾所周知,唔少飛黃騰達嘅巴西球星都係從基層出生,透過自己嘅天分及努力,先至贏到今時今日嘅成就,PUMA嘅設計團隊就留意到基層社區嘅建築物,有唔少都會將外牆塗成七彩顏色,當地仲盛行Grafitti藝術文化;貧窮並無礙巴西人嘅樂觀性格,反之佢哋識得苦中作樂,喺唔同嘅生活層面上為自己打氣,於是設計團隊以此作為創作靈感,化身成evoPOWER 1 Graphic FG嘅新模樣。顏色斑爛之餘,鞋尾以及隨盒附送嘅鞋袋,仲印有葡萄牙文「Que emocionante uma partida de futebol」,意思係「多麼令人興奮嘅足球遊戲」,道出巴西人對足球嘅熱愛。依家世界盃已經去到16強淘汰賽階段,唔知又有幾多球員會改着evoPOWER 1 Graphic FG呢?我估南美洲嘅球員,尤其是巴西隊嘅中堅丹迪(Dante),應該會對呢款新Boot更有共鳴吧!

查詢:

2317 1686(旺角朗豪坊7樓Futbol Trend)

2295 0268(中環士丹利街卡佛大廈Futbol Trend)