今屆世界盃分組賽啱啱打完，唔少傳統列強都大熱倒灶，反而好似哥斯達黎加、哥倫比亞以至希臘等原本不被睇好嘅球隊，憑拚勁、膽識及團結力量，爆冷殺入16強，唔只證明咗伍晃榮嘅名言：「波係圓嘅」，仲體現咗Nike Football嘅精神—Risk Everything。其實Risk Everything精神唔只存在於足球場，仲可以融入生活，甚至化身成主題Club House。Nike HK就趁世界盃期間，精心布置咗一間Nike F.C.神秘會所，現在就入去探究一番。

通往館內嘅走廊兩旁，唔只有費高、朗拿度等經典球星嘅大頭相，就連今期大熱嘅尼馬都有份。

館內布置成間Club House咁款，未坐低已經覺得愜意過人。

牆上掛滿來賓與球星嘅照片，說明Nike F.C.嘅精神，無國界之分。

館內別有洞天，另闢娛樂室，有片睇又有機打，就連地氈都設計成球場模樣。

屬於非賣品嘅Nike F.C.畫冊，一場來到非看不可，咁有型嘅尼馬，你又見過未？

睇武俠小說，唔理金庸或古龍，必然會出現類似「聚賢莊」嘅地方，武林大俠聚首一堂，原來足球界亦都依樣葫蘆，呢間以Nike F.C.為題嘅神秘Club House，位於麥花臣室內場館之中，展期至7月13日，只會招待指定嘅本地球員、名人，以及喺Winner Stay比賽中有出色表現嘅參加者。早前本報獲邀入內探秘，首先經過門口對出嘅走廊，兩邊貼滿晒懷舊風嘅球星黑白海報，充滿歷史傳承嘅氣氛，牆上仲寫上Nike F.C.嘅精神內容，館主「阿陸」解畫說︰「Nike F.C.係一班國際球星喺1994年創辦，類似Membership嘅組織，包括會長朗拿度、費高、簡拿華路及托迪，佢哋都係當時國家隊嘅風雲人物，有幾位仲做埋隊長。佢哋搞Nike F.C.嘅原因，係想傳播一個精神，呢堵牆就可以睇到晒，最重要就係『Without Risk, there is no victory』，即係足球員只要喺場上肯拚搏，就會得到勝利。」

擺好甫士影沙龍

入到館內，即時畀一幅掛滿晒相片嘅牆吸引住，唔只有球星相，仲有早前已經到訪嘅人士，都影咗相掛晒喺度，阿陸繼續介紹︰「除咗頭先喺門口見到嘅球星，其實亦有一班現役嘅足球員，包括喺巴西好紅嘅尼馬，仲有意大利嘅前鋒奧斯華度，以及英格蘭嘅中場韋舒亞，佢哋都做緊以前一班Legend球星做緊嘅嘢，就係承傳Nike F.C.精神。呢堵牆中間有一個Screen，就係上嚟Nike F.C.嘅嘉賓，都會有Photo Shooting時間，到時會着住Nike F.C.嘅服飾，影完之後就會喺個Screen見番自己。」呢張型格照片仲會Send番畀你，到時就可以擺上facebook或者instagram威威。

獨一無二紀念Tee

至於另一幅牆就好似Boutique咁，掛起晒今期Nike F.C.嘅新Items，有Tee、有鞋又有Track Suit，阿陸解釋當中嘅設計理念︰「足球員喺球場上有Performance嘅衣服，出街嘅話，我哋Nike Sportswear都會為佢哋預備咗一啲服裝，包括Tee及N98外套。」除此之外，館內仲展出咗好多Nike F.C.嘅Colorful新鞋款，配色都源自Nike最近推出嘅兩款新波Boot—黃色嘅Magista及紅色Mercurial，衍生鞋款包括Tiempo‘94，Air Max 1及Roshe Run等，令大家平日出街都繼續沉醉足球嘅氛圍。

睇完衫、睇完鞋，仲有乜好睇？原來館內仲有一間娛樂室，有大芒播住Nike依家熱播嘅「The Last Game」短片，又可以打機，筆者最鍾意係枱上嘅Nike F.C.畫冊，裏面有好多球星嘅黑白型格沙龍，張張都Chok過林峯！一場嚟到仲有禮物送，到場嘉賓會獲贈Risk Everything Tee一件，仲可以印埋名或自組字句，包保獨一無二，唔會同人撞衫啦！