旋轉鏡頭E7 mini自拍靚爆

Instagram和「面書」之上，周不時都見索女自拍照，可惜唔少相片都受手機前置鏡頭質素影響，搞到效果鬆郁朦！有見及此，國產品牌Ginoee的新手機E7 Mini就備有1,300萬像鏡頭，最特別係鏡頭組件可以201度旋轉，當係前置或後置鏡頭用都得，加上內置美顏等靚爆功能，女士必Like！

$2,198

鏡頭組件位於機身頂部，1,300萬像素鏡頭質素都唔錯。

鏡頭組件可以201度旋轉，任何攝影角度都冇難度。

機背採用塑膠物料，手感只屬一般。

隨機附送揭蓋式機套，可惜不具備Smart Cover功能。

支援雙卡雙待功能，一體式卡槽可以同時放置兩張microSIM。

備有美肌模式，可以美白、瘦面兼整大隻眼，話咁易變索。

採用八核心處理器，《Antutu》獲得超過26,000分，成績合格。

預載《手機加速》搖一搖機就可以幫用家清理RAM。

內置《金立閃傳》，配對之後就可以與其他手機經藍芽互傳檔案，程式、相片、文件都得，夠實用！

201度旋鏡

其實旋轉鏡頭算不上係創新設計，好耐以前初代3G摺機已經有，不過當時以玩視像通話為主；近年呢種設計就被國產機重新演繹，好似Oppo N1就勁多女用家Buy。新機E7 mini的設計就同Oppo N1相似，有別於一般手機鏡頭分前置、後置兩組，機身頂部只有一組鏡頭，但就可以201度旋轉，每當轉到正前方或正後方時，相機功能就會自動啟動；而其他角度都可以進行拍攝，玩低炒、高炒自拍就更加方便。

美顏兼瘦面

旋轉鏡頭除易就角度外，拍攝質素都唔差，佢備有1,300萬像素鏡頭及F2.2大光圈，唔似得一般手機要靠個低像素鏡頭仔，效果自然靚得多。另外，E7 mini內置HDR、特效拍照、微笑快照、手勢拍照等基本功能之餘，當然唔少得女士必備的「美肌模式」，自動幫你整大隻眼、瘦面、美白，而美肌仲有1至12級畀你揀！

靚芒八核

此機規格其實都好足料，用上MediaTek 1.7GHz 八核心處理器、1GB RAM及16GB ROM，睇片、上網、打機都唔會Lag。唯一可惜就係機身玩一體成形設計，冇得插卡兼換電，擴充方面難免扣分。值得一讚就係採用Sharp出品的4.7吋IGZO屏幕，加上解像度達720p，不單顯示細緻、色水自然，就連耗電量都大大減低，電量更襟用。系統方面，預載Android 4.2，亦特別改用自家AMIGO 2.0 UI，圖示經重新設計，冇AppDrawer，簡潔又易用。