筆者利申在先，早喺《盜墓者羅拉》（Lara Croft：Tomb Raider）年代已經係安祖蓮娜祖莉嘅粉絲，睇住佢由性感尤物蛻變為實力派女星，最厲害當然係《換命謊言》（Changeling）無懈可擊嘅演出，真係不枉佢每齣戲我都捧場支持。正如好多身兼電影迷及Figure迷嘅玩家一樣，當然好想「畢嫂」有Figure推出，早年亦都出過，不過質素只算一般。等到今年，慶幸有《黑魔后︰沉睡魔咒》（Maleficent）上畫，就由Hot Toys還各位娜姐粉絲心願，你又準備好打開銀包進貢未？

HT MMS247《Maleficent》 1/6 Maleficent
零售價：$1,430
預訂價：$1,390
推出日期：預計今年第四季至明年首季

隨盒附有一對綠色魔燄特效組件，重現黑魔后對啱啱出世嘅愛洛施咒一幕。

講頭雕，真係無得輸，由五官輪廓到塗裝都似模似樣，仲有頭上嗰對角，雕工極盡仔細。

暫時嘅官圖所見，烏鴉Diaval只有佇立形態，不過廠方表示呢個造型仍未係最終版本，尚待批核中，個人意見最好整多個飛翔造型啦！

由於畢嫂身形偏高，故此HT黑魔后亦都高約29cm，明顯高過一般同比例嘅女生Figure，唔知幾時HT會出埋畢彼特（Brad Pitt），出齊兩公婆呢？

雖然安祖蓮娜祖莉貴為荷里活嘅一級影星，不過以佢為題嘅Figure就少之又少，相信最大原因係佢未有接拍Super Hero類型電影，除咗羅拉，佢從影以嚟最適合Figure化嘅角色，相信都係《Mr. and Mrs. Smith》了，不過市面上見到嘅「史密妻」Figure，大多數都係玩家自行組裝，質素頗為參差。拍過古裝及時裝戲後，畢嫂今次挑戰迪士尼童話，接拍《黑魔后》，當中嘅女巫造型咁出位，Hot Toys自然唔會錯過，仲出動到四大猛人炮製頭雕，夠晒大陣仗！

四大名師 巧製超像真頭雕

到底係邊四大猛人咁巴閉？首先頭雕方面有Sun Hye, Yoo及Seung Min, Kang聯手出擊，仲有HT王牌Yulli擔任頭雕美術指導，至於塗裝方面，就由品牌嘅No.1高手JC. Hong負責，顯見HT嘅高度重視；高顴骨、高鼻樑及厚厚嘅珠唇，呢啲畢嫂深入民心嘅面容特徵，HT都一一忠實還原，而且跟足電影中嘅人設特色，喺蒼白嘅面色上，顴骨位及眼影塗裝都落重手，最厲害係以青色為主嘅雙目，琉璃般嘅透明色調之內，仲有一抹近乎血色般嘅魅影，攝神奪魄嘅效果，不讓3D電影嘅近鏡專美。

收身長袍 凸顯曲線美

頭雕造工出神入化之餘，主體製作亦落足心機，首先近年嚟嘅畢嫂已經比初出道時有大幅度瘦身，故此HT亦選擇咗高挑修長嘅專用素體，而且要突出以上特點，服裝方面就要盡量貼身。電影中嘅女巫斗篷長裙，又長又大件，想做到貼身其實有好大難度，HT就喺剪裁上花多幾重工夫，尤其是利用皺摺布紋技巧，配合薄身嘅布料，將呢件女巫服嘅各個細節巨細無遺還原出嚟，仲展現到素體嘅線條美。

不過有讚亦有彈，既然HT今次咁勞師動眾幫畢嫂出Figure，但係只得一款頭雕表情，似乎大嘥咗啲喎，事關戲中唔只有Cool Look，亦有流淚及暴怒等不同表情可以參考。除此之外，整套Boxset嘅主要配件就只有五款造型手掌、一支權杖、一個地台、一對綠色魔燄特效組件，以及同比例嘅烏鴉Diaval雕像，Diaval身為黑魔后嘅忠僕，除咗會佇立喺權杖上等候黑魔后差遣，仲常常遠飛幫主人監視睡公主愛洛（Aurora），點解唔整埋飛翔姿態嘅Diaval；最大問題係黑魔后原本有一對大大嘅羽毛翼，貫穿咗成套戲嘅劇情發展，呢對咁重要嘅Parts，竟然冇包喺今次嘅Boxset之內，實在可惜。

facebook專頁：www.facebook.com/hottoyssecretbase　

查詢：3722 3988（旺角彌敦道信和中心20樓Secret Base）

＊圖片所示仍屬產品原型，與最後完成品或有若干分別。