偏食唔健康，細路唔明白，想氹小朋友食多啲生果，你有乜嘢辦法？唔知東映是否為下一代嘅健康着想，喺《幪面超人鎧武》之中，就將各式生果化為變身元素，咁做法有冇令日本嘅小朋友食多咗生果就不得而知，不過就一定嚇到唔少拉打迷眼都大埋，玩到咁大，出Figure嘅話你仲買唔買先？

（左）SHF Kamen Rider Gaim Orange Arms 建議零售價︰$389.9
（右）SHF Kamen Rider Baron Banana Arms 建議零售價︰$389.9

槍身前半截可以換Parts，組裝成基本型（圖）及加長型兩種形態。

加長型

鎧武備有無雙軍刀及大橙丸做武器，兩者仲可以上下結合，變成薙刀無雙切（Naginata Musou Slicer）（圖）形態。

無雙軍刀

大橙丸

鎧武腰帶嘅左右兩側，分別可以掛上無雙軍刀及定鎖種子，後者仲可以跟足劇情，掛喺無雙軍刀之上。

無論鎧武或巴隆，身上都有齊精細花紋，細緻度可說是近年來同系最高。

鎧武及巴隆各有收納形態嘅定鎖種子，Parts表面分別有清晰嘅橙及香蕉圖案。

腰帶中央可以裝上打開形態嘅定鎖種子，用嚟發動功能嘅小刀亦可上下撥動，不過小心呢兩件Parts都幾易甩。

SHF鎧武及巴隆分別送屏風及地台，留意地台上唔只有佢哋兩個嘅徽號，其餘兩個分別代表由葡萄變成嘅龍玄，以及「哈蜜瓜拉打」斬月，呢兩位將於八月推出。

龍玄

「哈蜜瓜拉打」斬月

於去年10月於日本首播，播到依家已經接近尾聲嘅《幪面超人鎧武》，當中嘅一眾拉打利用「定鎖種子」（Lock Seed）及「戰極驅動器」（Sengoku Driver）變成能力各異嘅武士，各人仲有專屬嘅生果裝甲，例如第一男主角鎧武（Gaim）就會着上柳橙鎧甲（Orange Arms），至於第二男主角巴隆（Baron）就着香蕉裝甲（Banana Arms），如此類推，其他拉打亦用同一手法變身，而且形形色色嘅生果裝甲仲可以互換、合併，變成萬能Key，若果將佢哋逐一商品化的話，自然可以長出長有，Bandai果然識計數。

日本代表　雙刀流鎧武

不過玩到咁破格，好難令人即時受落，難怪劇集本身播咗大半年，鎧武及巴隆先至啱啱登入SHF系列，都算係姍姍來遲，好彩產品質素有驚喜，足以抵銷慢半拍嘅影響外，甚至可以消除傳統拉打迷對「拉打生果化」嘅心理壓力，對「鎧武」系列重新改觀。先以SHF鎧武為例，維持系列一向標榜嘅高可動性外，裝甲組件仲有精細嘅雕工及充滿金屬感嘅塗裝，尤其是橙色位置嘅色澤深淺度，果然貼題。至於變身器定鎖種子由於太過的骰，做唔到開合功能，不過隨盒都有齊開合兩款形態Parts，又可以裝喺無雙軍刀（Musou Saber）上，跟足劇中設定。筆者至Like嘅設計，係胸甲兩邊嘅金色羽毛翼用軟膠製成，跟足劇中人設之餘，又唔會阻住雙臂活動，夠細心。

歐洲代表　槍王巴隆

至於同步上架嘅SHF巴隆，一雙大大件嘅蕉形肩甲，難免會影響雙臂擺動，於是廠方喺肩甲與膊頭嘅連接關節上花心思，做到可以向上揭起及左右轉動，盡量保持雙臂嘅活動幅度。至於武器方面雖然唔夠鎧武多，不過長槍前半截可以切換為基本型及加長型組件，配合多款造型手掌，擺出多元化嘅刺擊甫士。美中不足係左肩甲、手肘裝甲，以及腰帶上嘅定鎖種子及刀仔形Parts都幾易甩，玩家切記小心咪丟失。為咗增加呢一對SHF生果拉打嘅號召力，鎧武及巴隆分別送上金色屏風及黑色地台，讓玩家自組情景，咁講法，即係要人買齊一對先安樂啦！

©2013石森プロ．テレビ朝日．ADK．東映

查詢：2433 1828（瑞華行）