Huawei Ascend P7 6.5mm薄讚

潮流興修身，原來手機都唔例外，講緊嘅就係Huawei新作Ascend P7。此機最大特色就係「薄切」，機身僅厚6.5mm，拎上手超輕巧；配合一體成型機身，絕對係有型有款！而且此機大幅提升硬件規格，全高清屏幕、4G制式、高像素鏡頭一律有齊，誠意十足！

$3,680

備有黑、白兩色，用色大路。

機身僅厚6.5mm，邊框位置更用上金屬物料，手感不俗。

採用一體成型設計，SIM卡及記憶卡槽都需要用針拮出，略嫌麻煩。

前置鏡頭達800萬像素，自拍質素相當不俗。

機背鏡頭則為1,300萬像素，備有HDR、濾鏡等拍攝功能。

香港小姐冠軍陳凱琳都大讚：「Ascend P7夠晒纖薄，好似藝術品咁靚！」

內置《手機總管》，可以掃描並自動清除手機的食RAM及嘥電Apps，保持系統順暢。

處理器唔算旗艦級，不過行Benchmark都取得超過25,000分，用落順暢，表現合格。

預載簡約風格介面，變晒大格兼彩色圖示，簡單易用。

內置「浮動按鈕」功能，虛擬鍵以半圓形顯示，亦可以隨意移動位置，方便篤芒操作。

薄身玻璃面

Ascend P7其實大概一個月前先喺法國巴黎大搞發布會，估唔到話咁快就輪到香港推出。作為Ascend P6後繼機，P7當然要繼承「薄切」風，機身厚度僅得6.5mm，雖然數字上都係輸畀P6嘅6.18mm；不過考慮到其屏幕增大至5吋，加上124g之重量，可算輕巧！除咗夠薄，P7設計都要一讚，採用一體成型，機面、機背都用上Corning Gorilla第三代強化玻璃，配合銀色金屬邊框，觀感高貴得來又唔單調，完全搣甩山寨味！

全景自拍

「Selfie」自拍聽得多，今次Huawei再教多大家一個生字叫「Groufie」，原來呢個字嘅意思係Group Selfie。一般手機嘅前置鏡頭功能有限，頂盡得自拍計時及美白功能，但P7除咗有齊上述功能外，仲新增全景拍攝，前置嘅800萬像素鏡頭會拍攝三幅相，再合成全景相片，以後影大圍自拍相就唔使搵路人甲幫手！前置鏡頭巴閉，後置鏡頭都唔失禮，搭載1,300萬像素F2大光圈鏡頭，微距、遠景成像都唔錯；最方便就要數「高速解鎖拍攝功能」，熄芒時連按兩下「音量-」就可開啟相機兼同時按快門，成個過程一秒鬆啲搞掂。

高清靚芒

相比P6，Ascend P7規格可算大幅提升，屏幕尺寸由上代4.7吋稍稍增大至5吋，解像度就倍增至1,920×1,080，現場試玩，屏幕顯示細緻，對比度、亮度甚至可視角均有水準，效果極好。其自家研發處理器叫HiSilicon Kirin 910T 1.8GHz，有四核心，配合2GB RAM，雖未算旗艦配置，不過操作、開Apps亦非常流暢。另外P7支援LTE Cat 4制式，兼容800、900、1,800、2,100、2,600MHz頻譜，配合相關網絡的話，最高下載速度可以高達150Mbps，上網玩串流就唔使慢慢等。系統方面，內置Android 4.4，沿用Emotion UI介面，無AppDrawer，亦備有簡約風格介面，就算唔熟智能手機操作都易上手。值得一提，它預載「超級省電模式」，開啟後屏幕會轉為黑白色，兼僅開放通話、訊息等基本功能，令續航力大幅延長，電量隨時可頂到一日！