新加坡直擊：秒速自拍王LG G3

現在幾乎所有女生都有鋪自拍癮，間接令自拍神器有價有市。LG剛於新加坡發布的年度機王G3便正正以自拍為賣點，內置Gesture Shot功能，用家握拳即倒數影相，毋須按快門，方便到暈；加上支援雷射對焦，舉機即拍，快如閃電！G3前天已於韓國正式發售，首日已賣出22,000部，比G2開市賣9,000部勁得多！至於港版亦好快登陸，買嚟冧女冇得輸！

採用幼邊框設計，屏幕比例佔機面76.4%，視野比同尺寸手機闊好多！

現場有黑、白、金三色試玩，當中以金色最搶眼！

移植上代的Rear Key，並提供1,300萬像素鏡頭及雙LED燈。

握起拳頭即可自拍，仲有3秒畀你擺靚表情同動作！

比較兩大機王，G3（左）顏色較飽和真實，S5（右）亮度就較高，各具賣點。

QuickCircle保護套備有五種顏色，圓形天窗可睇時間兼開啟常用功能。

Smart Notice這新功能可按時間、位置提醒用戶，落雨時叫你擔遮，無電時叫你充電，細心到如母親一樣！

預載LG Health，可經計步器評估用戶健康情況。

環球影城試相
戶外影相曝光、白平衡都好準，而且沒有偏色，成像一流！

透過雷射技術，Dancer跳住舞都可成功對焦，鬼影亦唔多！

發布會於新加坡Art Science Museum舉行，主要招待港、台、泰等地的傳媒。

LG Regional CEO Weon Dae Kim揭開發布會序幕。

雷射對焦　握拳即影

發布會主題為「Simple is the New Smart」，可見G3概念正是化繁為簡。當中最能表現這點的，首推影相一環。G3配備了1,300萬像素光學防手震OIS+鏡頭，單睇數字唔算太勁，但就首創雷射對焦技術，影相前用雷射光線探測物件距離，從而加快對焦速度。小記在新加坡環球影城實測，發覺對住紮紮跳的Dancer它也能快速對焦，即使走進昏暗環境也只是稍稍減慢，愛Snap的話一定畀Like！體貼的還有Gesture Shot功能，其前置鏡頭可偵測用戶動作，只要握緊拳頭，系統即進入自動倒數Mode，並有3秒時間畀你換表情甫士。現場同Model試玩，基本上一舉手握拳就認到，速度極快；即使大合照都一樣冇問題，自拍唔使再伸盡手指按快門，方便好多！

金色順眼　圓窗機套

機身是G3另一叫人讚嘆之處，首先它的屏幕有5.5吋，尺寸介乎手機與Phablet之間，加上弧形設計，拎起來比同廠G Pro 2更好手感。另外，G3雖係塑膠製造，但廠商卻在表面加入仿金屬塗裝，令外觀金屬質感有所提升；當中最搶首推金色，Eye Catching得來又沒有iPhone 5s的土豪感覺，整體高雅兼順眼得多！G3尚有黑、白、紫、紅等顏色，日後還會推出五色QuickCircle保護套，靚唔靚就見仁見智，但其圓形天窗就毋須揭蓋也能睇時間、撥電、聽歌同影相，比一般Window Cover更具玩味。

首玩2K　操作勁快

近來不少國產機開始轉用2K屏幕，偏偏大廠執着唔跟；G3就唔同，率先用上2K屏幕，解像度高達2,560×1,440，加上538ppi像素密度，規格比主要對手Galaxy S5高出頗多。將兩者同場比較，G3畫面稍為銳利細緻，花朵相連花芯都一清二楚，而且顏色飽和自然，長望舒服。惟它就不及S5亮度咁光，論鮮艷也稍有不及，可謂各具賣點。性能方面，它用上最頂級的2.5GHz四核心處理器加3GB RAM，撥頁開App速度勁快，在《AnTuTu》跑分更達34,286分，贏S5的33,159分一個馬鼻，足見它有力與眾機王一拚！然而要提提大家，G3另有2GB RAM版本，暫未知香港賣的是哪一個版本，但所謂有得揀先至係老闆，最理想當然係兩款都有得賣啦！