《Mario Kart 8》反重力大暴走

有傳Wii U主機銷情不理想，任天堂可能將會斬纜咁話！其實唔少任記自家招牌作都幾好玩，今日推出的《Mario Kart 8》就係其一。新作革新之處係可以反重力360度反轉，玩家駕駛新型磁浮賽車，在垂直甚至是倒吊的賽道上高速馳騁。遊戲亦加入多種新道具，當中名為「奇迹8」的道具更非常有霸氣！雖然要靠《Mario Kart 8》救番Wii U主機市場並唔容易，但肯定係現時Wii U機主必玩之作。

遊戲對應多種操控方法，GamePad或軚盤形手掣都得。

使用「奇迹8」道具時，車身會有八件道具圍住，霸氣十足。

Mario拎着的，正是全新道具新款回力標。

「食人花」這道具可以幫助玩家清理路面障礙。

磁浮新車可以反重力前進，在垂直賽道前進都無難度。

Mario Kart Stadium賽道旁有萬人觀戰，氣氛熱烈。

今集是系列史上首度以HD畫質製作，質素算見得人。

今集新增包括「庫巴七人組」在內的多位新角色供選擇。

Peach公主所駕駛的正是今集新設計的磁浮車。

磁浮新車倒轉行

當一款王牌遊戲出到第八集，要完全改頭換面真係無可能，不過至少《Mario Kart 8》所作出的少量改動都可令遊戲增加新鮮感。新作最大賣點是反地心吸力鬥車，雖然系列作之前都有類似設計，如彩虹賽道上有一段路程是反轉，一不小心就會跌進太空；但今集就真係換上磁浮車畀大家在傾斜、垂直甚至是倒轉賽道上風馳電掣，車上四個輪胎會升起平放，恍如當年《回到未來》的時光機。在反重力狀態下，可以使出新招式「回轉加速」（Spin Turbo），玩落都幾有趣，不過方向感麻麻的玩家小心玩到頭暈。

八大架生攬上身

識得玩《Mario Kart》，一定會用大量道具阻住對手超前及攻擊領前對手；加入新道具選擇自然係新作的指定動作，今集就追加了四項新道具，其中「回力標」用法跟以前紅龜殼、綠龜殼接近，都是拋出襲擊對手，其迴轉能力可令對手防不勝防。「食人花」用途是消除路障，使用時可以食晒車身附近的蕉皮。「超級喇叭」用途就似一個護身符，能夠抵擋對手及路障的攻擊。講到最霸氣，莫過於配合今次遊戲而設的「奇迹8」（Miracle 8）道具，使用時車身會於八件獨當一面的道具圍住，衝到對手車身旁邊就可令對手硬食中招，好有殺傷力！

多種操控玩網絡對戰

《Mario Kart 8》有四個主要場景，分別係體育館場地Mario Kart Stadium、水上樂園Water Park、峽谷地域Sweet Sweet Canyon以及遺迹版圖Thwomp Ruins，全部都各具特色。值得一提，今集是系列作首次對應高清畫質作品，動作流暢度同圖像表現都算唔錯。遊戲可以用多種操控方法控制，用GamePad、Classic手掣、Wiimote搭Nunchuk甚至是之前的軚盤形手掣都得。遊戲支援方面都算做得幾足，可四個玩家圍理一齊玩之外，亦支援遠距離網絡對戰，賽事精華還可以放上Miiverse頻道同其他玩家分享！