近期唔少合金玩具玩再版，筆者都有趁低吸納，不過物以罕為貴，剛剛開售嘅港產ES合金鐵甲萬能俠1、2號，若遲咗出手就小心要捱貴貨。今次嘅ES作品仍然由造型師「Lu.K」操刀，將經典造型Q版化後，依然不失原來英氣，而且將朋友號或金鷹號插入頭頂時，雙眼會跟足卡通橋段一樣，着燈扮成起動Mode，忠粉見到點會唔感動？

ES合金鐵甲萬能俠1號（右）、鐵甲萬能俠2號（左）
售價：$398/個

將朋友號插入萬能俠1號嘅頭部，雙眼就會自動着燈。

透過換件形式，萬能俠1號嘅腹部就可變成飛彈發射形態。

加裝「噴射飛船」飛行背包，令萬能俠1號更有英氣。

除咗朋友號，萬能俠1號仲有喺動畫後期出場嘅新朋友號（右），後者需要先更換機翼，才可以與頭部結合。

由於可動性高，可以輕易做到單膝跪地的Iron Cutter發射姿態。

萬能俠2號就附有兩把萬能寶劍，劍刃表面以電鍍製成，質感特別強。

背翼換成Great Booster，重現劇中與飛行器分離嘅撞擊絕技。

透過換件，就可將2號機嘅膝蓋內甲變成窩釘，或者係Cutter攻擊形態。

着燈Gimmick 重現起動Mode

兩款ES萬能俠嘅最大賣點，莫過於重現動畫中嘅起動場面，玩家只需另購兩枚LR41電餅裝入頭部，再將朋友號插入萬能俠，而金鷹號就與萬能俠2號結合，當戰機觸動到頭頂嘅LED開關，萬能俠雙眼就會着燈，夠晒氣氛！留意萬能俠1號額外附有「新朋友號」，兩部戰機都裝咗透明駕駛艙，見到男主角兜甲兒就坐咗入去，夠細緻。

含金量高 配件多元化

整體造型方面，基本上1、2號嘅「含金量」都相當足秤，軀幹連雙腳都用Diecast製成，相當墜手，而且髖關節及腳掌Ball Joint都內藏延伸機關，追加下肢嘅活動性，而且膝關節內藏齒輪，易扭易擰、接地性又高。筆者仲記得細細個買萬能俠POPY合金，最鍾意就係「鐵甲飛拳」真係有彈射功能，估唔到ES合金都玩到，無論係1號機嘅鐵甲飛拳，或者2號機嘅旋轉飛拳都內藏彈簧，畀玩家重拾兒時回憶。其他武器方面，兩款合金各自精彩，例如1號機嘅腹部可以換成鐵甲飛彈嘅發射狀態，對手又有Iron Cutter，並可追加飛行背包；2號機就有兩把電鍍寶劍，以及Great Booster背包，可以重現劇中與飛行器分離嘅撞擊絕技，美中不足係少咗對應招牌必殺技高熱火燄及雷電轟擊嘅特效組件，否則過癮度一定爆燈！

查詢：2390 9843（Action Toys）