玩盡SmartBand戴在手的日記
Sony近來推出咗全新SmartBand SWR10智能手帶，外形靚仔，仲有顏色選擇多多。原來呢條手帶識震動提示外，最犀利係可24小時記錄用家生活點滴，做過咩、去過邊都系統地Mark低晒，猶如電子日記。目前隨SmartBand附送有一大一細兩個碼黑色矽膠錶帶，男女啱戴。想要其他顏色，就要畀$198另購錶帶套裝，一套有齊白、黃、紫三色。
SmartBand冇屏幕，僅有個金屬鈕扣。而機芯就支援IP5/8防水標準，落雨、濕水都照用到。 $798
原廠本有多種錶帶配色，不過香港暫時只有黑、白、黃、紫。
採用內置電池，以microUSB充電，筆者用足四日都唔使充電。
機芯側設有實體按鍵，長按即可轉換日間或晚間模式；旁邊設有三盞LED燈，按鍵即會閃起，而不同閃亮方式則代表SmartBand正使用的模式。
錶帶設有凹槽供裝上機芯。
可以設定SmartBand的震動提示功能，包括通知、鬧鐘等，亦可自設輕敲錶芯操控指定功能。
晚間模式時，手帶會記錄用家的睡眠狀況，並計算出深層及輕度睡眠時間，圖表顯示夠清晰。
《Lifelog》採用圖示介面，上半部時段顯示用家活動，下半部則為整天的統計數據。
程式亦會記錄用家所到之處，一掃上方的時間部分；下半部的地圖就會顯示路線。
SmartBand SWR10係由機芯和錶帶兩部分組成，前者體積同迷你USB手指差不多，後者就有個槽位容納機芯；機芯連錶帶都只重22g，完全唔累贅。機芯本身支援NFC及藍芽，與Android 4.4兼支援藍芽4.0 Low Energy技術的手機配對就掂。筆者嘗試用Xperia Z2開NFC跟SmartBand一碰，手機會提你下載《智慧型連線》App，之後就掂。小記揀選來電和WhatsApp兩項提示，發現手帶震動明顯，而且跟手機幾乎同時響起，從此唔怕有Miss Call！另外，用家可以設定輕敲錶芯操控指定功能，例如開啟Smart Camera拍攝，又可尋找手機，無論手機係咪靜音，一尋找起嚟手機都會響番鈴聲，大頭蝦必用！
《Lifelog》記行蹤
除提示功能外，SmartBand SWR10仲可以記錄用家的生活點滴，只要下載專屬程式《Lifelog》，其感應器就會記低用家活動，好似步行、跑步等等，從而計算卡路里消耗等健康資料。另外，《Lifelog》仲會同時記錄用家使用社交Apps、遊戲、上網、拍攝的時段及時間，甚至連不同時段身處的位置都睇得到，一拖《Lifelog》程式上半部的時間分段介面就一目了然。最特別係SmartBand設有日間模式及晚間模式，日間就會記錄用家活動；而夜晚就會改為計算睡眠時間，深層、輕度睡眠時間都有圖表清楚列出，睡眠質素好與壞都有數得計。
查詢：8203 8863
