Jelly Bean升格植入Nikon CoolPix S810c

用手機影完相即刻Share出去，已經成為好多人的拍攝習慣，不過手機的畫質有限、鏡頭變焦又得啖笑，於是就有Android系統結合相機鏡頭的產品。今次Nikon S810c特別搭載Android 4.2.2 Jelly Bean系統，分享相片夠直接，更可以打機、睇新聞、睇片同埋聽歌，簡直是夢幻化身。

$3,380

配備12倍Zoom的鏡頭，支援25~300mm變焦，遠近景都涵蓋得到。

採用1,850mAh鋰電池，連續打機、睇片都可以玩足個幾兩個鐘。

旁邊設有HDMI和micro USB接口，萬一電量不足都可以用「尿袋」充電。

設有3.5mm耳筒接口，能夠一邊聽歌一邊影相。

試玩遊戲《釣魚發燒友》，玩得順暢，可是過場畫面的等待時間較長。

使用Android 4.2.2 Jelly Bean系統就能直接將相片上載到《Instagram》。

內置11種特殊效果，玩出不同風格。

電子快門的連拍速度能夠達每秒120張。

試相
畢竟S810c係一部相機，成像比手機靚得多，線條紮實又銳利，而且色彩豐富，具備Nikon的一貫風格。

內置Android 4.2.2系統

外形上，S810c跟兩年前推出的上代產品分別不大，一樣有黑、白機身選擇，不過系統就有大改動，其Android版本由2.3.3升級至4.2.2，可提供智能手機的大部分功能，唯獨不能語音通話。S810c用上Android，最大優勢是無需將相片過落電話，只要接駁Wi-Fi並「單撈」一眾社交平台Apps，就能夠直接Share相片。可惜S810c採用的Cortex-A9處理器時脈得800MHz，對比現時的手機來講唔算快，用落冇咁爽。

12倍Zoom鏡頭

至於鏡頭方面，S810c就由上代的10倍Zoom增幅至12倍，支援25~300mm變焦，無論遠近景物都影得到，去旅行最Fit，加上相機本身有11種濾鏡特效，能夠玩出不同效果，不過依家只要用《Instagram》或者《美圖秀秀》等Apps，張相點執都得啦！S810c的機身旁邊提供耳筒接口聽歌，最過癮係能夠一邊聽歌一邊拍片，而且相機亦改用micro SD卡，萬一唔記得帶卡都可以用電話裏張卡，加上本身內置4GB容量，想儲幾多張相、幾多首歌都唔係甚麼大問題。

加大至3.7吋屏幕

潮流興大芒，S810c都唔輸蝕，將屏幕由上代的3.5吋稍微加大至3.7吋，而且支援122.9萬像素，並支援篤芒功能。S810c個芒仲細過iPhone 5S小小，試上Youtube睇《變種特攻：未來同盟戰》的高清預告片，畫面尚算光亮清晰，亦都上過《東網》睇新聞，文章細字都睇得到，完全唔覺有問題。此外，由於用上篤芒的關係，機身的實體鍵比較少，除了開關和快門外，屏幕旁邊另設有三粒實體鍵，包括Menu、Home和Back，而實體鍵的好處係反應較快。