近年韓風停不了，不單K-Pop、韓劇大把人追，家陣連韓Phone亦有大把擁躉。除S牌及L牌外，識窿路的會玩埋韓國第三大牌Pantech，貪佢旗下手機性價比高得來又有新鮮感。最近Pantech有傑作Vega Iron 2抵港，此機在韓國號稱S5 Killer，無論屏幕、硬件規格及外形設計都足可與對方一併，最重要是水貨定價比行貨S5進取，貪新鮮的話不妨諗諗！

$5,480
採用直角設計，並搭載了5.3吋Super AMOLED屏幕。

比較兩部機王，Iron 2（下）屏幕的對比度較高；S5（上）則較光較細緻，各具賣點！

邊框係金屬製造，喇叭設計得幾美觀。此機僅厚7.9mm，以大芒機來說算超薄。

附送兩枚電池及一個充電器，照顧周到。

簡約純色機背有1,300萬像素鏡頭連補光燈，不過鏡頭微微凸起，放褲袋時小心刮花。

預載潮流App《MoCa Tree》，定期提供韓國最新時裝情報，泡菜族必追！

提供Today頁面，將重要日程及待辦事項整理為一頁。

內置《ViRobot Mobile》，提供基本掃毒及防護功能。

有十二種拍攝模式，美顏、HDR、全景、連拍及Dual Shot全部有齊。

賣相具霸氣

論名氣Pantech當然不及另外兩間韓廠，但論手機外形，小記就覺得佢夠破格。以Iron 2為例，跟時下流行一式一樣的圓渾Smartphone不同，全機充滿菱角，拎上手是有少許鎅手，但感覺有型兼夾有霸氣，若以汽車作比喻的話，S5是波子，它就是林寶堅尼！另一值得欣賞的是它用料夠紮實，設計如Bumper般的邊框是貨真價實的全金屬，而不是得個樣的金屬塗層，帶來具分量的手感，男士必Like！顏色方面，水貨商將入齊香檳金、玫瑰粉紅、黑金、黑紅及黑銀等多款顏色，男男女女實搵到一款啱自己！

電池勝S5

話明係S5 Killer，Iron 2規格自然唔弱，配備2.3GHz四核心處理器、3GB RAM及32GB ROM，《AnTuTu》跑分高達34,610，只輸S5一個馬鼻。至於屏幕就各有千秋，Iron 2的5.3吋芒比對手稍大，Super AMOLED面板顏色對比度亦較高，但S5亮度及細緻度就勝一籌，喜愛邊一款因人而異。咁Iron 2有咩優勝呢﹖電池是也！不但容積達3,220mAh，多過對手，跟盒更附送兩枚電池及一個充電盒，快速充電下兩小時便叉爆。換句話說買咗佢，出街只要帶多塊電池就得，可真正告別尿袋。

操作簡單人人都識

系統方面，Iron 2用的是最新Android 4.4.2 KitKat系統，整體操作極為流暢，撥號、開App都感覺不到一絲遲滯，Snapshot對焦及儲相速度亦夠快，心急鬼無得投訴！介面方面亦有好多嘢玩，例如可叫出「Multi Window」，以隨時開啟瀏覽器、短訊、相簿或地圖等常用工具；另外又提供獨立「Today」頁面，將天氣、行事曆、待辦事項及周年紀念等放埋一齊，方便大忙人管理日程。身為機王的它當然支援體感操作，聽歌或睇相時在屏幕上方揮一揮手，即可轉歌換相；若想更新系統狀態，搖一搖手機就得，操作簡單又實用，係人都識！

SPEC

制式︰GSM、WCDMA、LTE

處理器︰Qualcomm Snapdragon 801 2.3GHz四核心

記憶體︰3GB RAM、32GB ROM、支援microSD卡

屏幕︰5.3吋Super AMOLED（1,920×1,080解像度）

鏡頭︰前置210萬像素、後置1,300萬像素

對外連接︰藍芽4.0、microUSB、Wi-Fi

電池容積︰3,220mAh

作業系統︰Android 4.4.2

體積︰144.2×73.5×7.9mm

重量︰153g

查詢︰2374 0618