呢排黃、紅、黑雨輪住嚟，分分鐘擔遮都全身濕晒！濕身事小，最驚就係雨水淋壞手機、相機等Gadgets。唔通一遇水就要收落袋唔用？好在市面上都有一系列抗水Gadgets，落雨呢啲咁輕度嘅水滴當然頂得住，有啲甚至可以掟落幾米水深添！以後都要學廣告講句：「其實落雨有咩好怕喎！」

Plantronics BackBeat FIT $998（f）
防護能力：防汗水及水滴

Sony SBH80 $898（c）
防護能力：防潑水

Jabra Rox Wireless $899（g）
防護標準：IP52

Soul Flex $699（h）
防護標準：IPX5

Docomo AQUOS Phone EX SH-02F $4,080（a）
防護標準：IPX5/7
機身玩一體成型設計，機面底特別設有條狀LED燈，都算有特色。

Samsung Galaxy S5 $5,998（b）
防護級數：IP67
備有指紋辨識器，除咗有保安功能外，仲可以用來網上購物。

Docomo ARROWS Tab F-02F $3,880（a）
防護標準：IPX5/8、IP5X
機面右邊有指紋識別器，用家可加入多位用戶指紋設定檔，一掃即開相關人士嘅自訂頁面。

Sony Z2 Tablet $3,890（16GB Wi-Fi版）、$4,690（32GB Wi-Fi版）、$4,990（16GB LTE版）（c）、防護標準：IP55/IP58
Z2 Tablet的屏幕採用Live Colour LED，顯示顏色豐富、自然。

Olympus Stylus TG-850 Tough $2,490（d）
防護能力：10米防水
備有21mm超廣角五倍變焦鏡頭，近遠攝都得。

Nikon COOLPIX AW120 $3,380（e）
防護標準：IPX8
同上代一樣提供迷彩配色，型到震！

OtterBox PURSUITS/40 US$34.95（i）
複合材料鎖扣，開啟容易，但又確保防水能力。

外形超Raw，仲可以扣上登山扣，方便攜帶。

拆解防護標準

依家唔少產品都聲稱支援防護標準，最常見而且世界通用嘅標準就有IP Code。IP Code由國際電工委員會訂立，指International Protection Marking或者Ingress Protection Marking，意思係產品對外來物嘅防護能力。IP Code一般由IP及尾隨兩組數字組成，例如IP67、IP58，前一個數字（0至6）為固態微粒防護，而後一個數字（由0至9K）則為液體滲透防護。每個數字分別代表不同程度之防護，例如產品支援IP58，即代表可以防塵之餘，亦可於1米水深下正常使用。另外，IP後的數字有時會以X代替，指產品不合乎該項標準，例如IPX5；而5/8則表示同時支援5及8項。值得一提，近年亦有廠商指產品支援防潑水、生活防水等，實際防水能力就要視乎廠商說明。

防護小貼士

要令Gadgets防塵防水，廠商一般會將產品的外露位置如耳筒、USB、機背殼等以保護蓋封閉。用家每次使用時最好檢查一下保護蓋有否蓋實，若然鬆脫不穩的話，就一定要維修，否則防護作用隨時失效。另外，每次濕水後，建議大家用清水沖洗，以免液體嘅鹽分或化學物質侵蝕機身，而且濕水後亦應該盡快抹乾或風乾。

固態微粒防護

等級 物體大小

0 －

1 >50mm

2 >12.5mm

3 >2.5mm

4 >1mm

5 防塵

6 完全防塵

液體滲透防護

等級 液體狀態

0 －

1 滴水

2 傾斜15度滴水

3 噴霧

4 潑濺

5 水柱

6 高壓水柱

7 浸入水中1米

8 浸入水中超過1米

9K 高溫水柱直射

耳機篇：Plantronics BackBeat FIT靚聲耳機

手機就話防水，但要喺雨中聽歌就一定要夾埋防水耳機。BackBeat FIT專為運動而設，因此支援P2i軍用級納米防汗技術，汗水及微雨都頂得住。耳機本身內置13mm驅動單元，音質有保證；加上於耳筒部分加入通話及音樂播放按鍵，操作更就手。值得一讚，佢隨機附送彈性保護袋，可收藏耳機，反轉就會變成模特兒手臂上的Sport Armband，做運動袋手機最啱使。

Sony SBH80煲粥清晰

Sony手機嘅用家，不妨考慮同廠出品嘅SBH80。廠方話耳機同手機一樣支援防水功能，一般落雨、濕水都冇問題。此外，耳機支援高清語音通話，可以有效降低背景噪音；而且仲內置雙Microphone，煲電話粥特別清晰。抵讚在耳機仲兼容aptX音訊增強技術，配合支援相關技術嘅手機，聽歌效果零舍好！

Jabra Rox Wireless好動之作

唔單止Plantronics，另一藍芽品牌Jabra都齊齊加入戰團，推出防水耳機。新作Rox Wireless就支援IP52防水防塵標準，可以抵禦滴水；加上僅重19g，超輕巧。最貼心就係耳筒兩邊分別內藏磁石，只要將耳筒部分背對背貼實，耳機即會進入省電模式，待機時間仲長達18日！

Soul Flex潮牌過界

講防水功能，呢款Soul Flex就最勁，皆因佢符合IPX5標準，用水柱幫佢洗白白都得；再配合埋防水及防汗耳塞，落雨練跑都掂。外形方面，耳機採用耳掛式設計，除咗唔易甩之外，仲相當貼耳，戴得舒適。值得一提是，廠方特別於耳掛表面加入抗菌功能，大汗人士都戴得衞生。

手機篇：Docomo AQUOS Phone EX SH-02F日系靚芒

就算出面幾大雨，有來電或有WhatsApp點都要應機！一如大部分日系手機，SH-02F都濕得水，支援IPX5/7防護標準，即係1米水深下都可以正常使用30分鐘，黑雨都唔驚！另一賣點係其4.5吋屏幕，像素密度竟然高達487ppi，顯示超細緻，睇網頁文字尤其明顯。而SH-02F亦內置Qualcomm Snapdragon 800四核心處理器、2GB RAM等強勁規格，操作、玩Apps都勁爽！

Samsung Galaxy S5好動韓風

講防水手機，以往得日系機獨大，依家終於有其他選擇。作為Samsung嘅年度旗艦機，Galaxy S5今次主打健康功能，除咗機背嘅心跳感測器之外，仲支援IP67抗水防塵，落水1米冇問題，帶佢跑步、游水都得，鼓勵用家做多啲運動咁話。此外，佢仲備有1,600萬像素鏡頭、0.3秒對焦、Selective Focus對焦選擇等功能，亦兼容4K拍攝，拍攝功能齊備。

平板篇：Docomo ARROWS Tab F-02F 2K顯示

落大雨想繼續喺街煲劇的話，呢部F-02F就幫到手。此機備有10.1吋IPS屏幕，最犀利就係解像度高達2,560×1,600，比出名靚芒、備有2,048×1,536解像度Retina Display嘅iPad仲細緻，煲劇冇得輸。不能不提是F-02F同時支援IPX5/8防水標準，於水中、浴室都可照用。順帶一提，新機電池容量達9,600mAh，用4G玩足成日都唔使充電，好長氣！

Sony Z2 Tablet 6.4mm薄切

想再輕便啲，不妨考慮Sony新出嘅Z2 Tablet。雖然佢都備有10.1吋屏幕，不過一體成型設計超輕薄，僅厚6.4mm，比iPad Air仲要薄，加上只係重439g，拎出街絕唔累贅！外形方面，此機就似足放大版嘅Xperia Z2，相當靚仔；加上仲符合IP55/IP58防護標準，1.5米水深都可以玩足30分鐘。不可不提，Z2 Tablet嘅810萬像素鏡頭仲可以玩埋AR虛擬公仔拍攝，夠晒過癮。

相機篇：Olympus Stylus TG-850 Tough 雨中自拍

普通相機經常會因受潮而壞機，雨天梗係唔會拎出嚟博啦！咁大家可改用呢部TG-850，雖然冇講明支援咩標準，不過廠方話機身可防水10米，而且仲追加埋2.1米防撞、100kgf防壓及-10℃防寒，超硬淨！最正就係備有3吋翻揭式屏幕，可以向上翻180度，自拍、低抄自然冇難度。此機特別在內置四種水底拍攝模式，會自動校好白平衡及飽和度，畫面唔會過藍，落水影魚仔都好Easy。

Nikon COOLPIX AW120 分享靚相

此機係舊作AW100嘅升級版，同樣防水、防撞、防塵同防寒，支援IPX8防護標準，官方就話潛到18米水底都可以影足60分鐘，絕對夠撐。另外仲備有GPS定位及地圖功能，可以將相片顯示於全球地圖上，做旅行記錄或者同朋友Share都咁方便；而且仲加入埋Wi-Fi功能，手機裝咗指定App仲可以變做相機遙控器或者用手機即時上載相片。

同場加映：OtterBox PURSUITS/40全護硬殼

如果唔想添置防水Gadgets，又唔想現有嘅手機濕身整壞的話都有計！OtterBox PURSUITS/40保護殼外部採用矽膠緩衝層，內部隔層網及橡膠墊就可以令盒內物品冇咁易移位。盒身擺得落一般大芒Android手機，仲可以放埋鎖匙、太陽眼鏡、銀包等小物，唔驚入水之餘，仲可以扣上手袋或皮帶上。根據廠方表示，產品支援100呎（約30米）防水、抵禦1,000磅壓力，同時防摔、防塵，水浸都唔驚啦！

查詢：（a）2374 0618、（b）3698 4698、（c）2345 2966、（d）2376 2150、（e）2907 1122、（f）2395 3913、（g）2201 7233、（h）2262 1173、（i）www.otterbox.com.hk